Сергей Лавров, вазири корҳои хориҷии Русия гуфт, таҳдидҳои амниятӣ дар Афғонистон ҳанӯз аз байн нарафтаанд. Ӯ гуфт, Маскав ба Тоҷикистон барои таҳким додани амнияти марз бо Афғонистон кумак мекунад.

Рӯзи 16-уми октябр Сергей Лавров дар нишасте, ки дар шаҳри Маскав дар мавзуи амнияти Осиёи Марказӣ ва Афғонистон доир шуд, гуфт, рафъи оқибатҳои ду даҳсолаи ҳузури низомии ИМА ва НАТО дар Афғонистон вақти зиёд талаб менамояд.

Дар ин нишаст намояндагони Созмони аҳдномаи амнияти дастаҷамъӣ (СААД), Иттиҳоди давлатҳои Мустақил ва Созмони ҳамкории Шанхай, инчунин, мақомоти давлатӣ, дипломатҳои кишварҳои минтақа ва коршиносон иштирок доштанд.

Сергей Лавров гуфт, Маскав ба мардуми Афғонистон расондани кумакҳои иқтисодӣ ва башардӯстонаро идома медиҳад. Вай гуфт, Маскав аз талошҳо барои таҳкими амнияти марзи Тоҷикистон ва Афғонистон ҳимоят мекунад.

Вазири корҳои хориҷии Русия оқибатҳои ҳузури низомии Иёлоти Муттаҳидаи Амрико ва НАТО-ро аз омилҳое донист, ки ба вазъи Афғонистон таъсири дарозмуддат хоҳанд расонд. Ин изҳорот дар идомаи интиқодҳои деринаи Маскав аз ҳузури низомии зери роҳбарии ИМА дар ин кишвар садо медиҳад. Ӯ аз фаъолияти гурӯҳи тундрави “Давлати Исломӣ” дар Афғонистон изҳори нигаронӣ намуд. Тибқи гуфтаи ӯ, ин гурӯҳ мекӯшад талошҳои мақомоти Толибон барои таъмини субот дар Афғонистонро халалдор созад.

Сергей Лавров дар идомаи суханронии худ гуфт, Русия ба воситаи СААД ба Тоҷикистон дар таҳкими марзи давлатӣ бо Афғонистон кумак мекунад. Ӯ афзуд, Маскав барои сари вақт интиқол додани силоҳ, таҷҳизоти низомӣ ва дигар воситаҳои зарурӣ барои ҳифзи марз чораҳо хоҳад андешид.

Dialog.tj