Масъуд Пизишкиён, президенти Ҷумҳурии Исломии Эрон гуфт, ки Исроил ва Амрико бо ҷангҳои худ ба экосистемаҳои минтақа осеби ҷиддӣ мерасонанд. Ӯ аз ҷомеаи  байналмилалӣ хост, ки барои арзёбии зарари экологӣ ва барқарор намудани минтақаҳои осебдида чораҳои муштарак андешанд.

Масъуд Пизишкиён дар ин хусус рӯзи ҷумъа, 16-уми октябр дар нишасти сарони Конфронси XVII-и кишварҳои узви конфронс оид ба гуногунии экологӣ дар Ереван суҳбат намуд.

Президенти Эрон дар ҷараёни суханронӣ дар ҳузури сарони кишварҳо гуфт, паёмадҳои ҷанг аз талафоти ҷонӣ ва хароб гардидани зерсохторҳо фаротар рафта, ба табиат низ таъсири тӯлонӣ расондаанд. Тибқи гуфтаи ӯ, оташсӯзиҳо, ифлосшавии обу хок ва осеб дидани иншоотҳои саноатӣ метавонанд муҳити зистро барои солҳои зиёд таҳти таъсир қарор диҳанд.

Президенти Эрон таъкид намуд, ки ҳамлаҳои низомии ИМА ва Исроил ба иншооти саноатӣ ва энергетикӣ  дар минтақа ба паҳн кардани моддаҳои ифлоскунанда ва осеб дидани экосистемаҳои табиӣ сабаб шудаанд.

Ба таъкиди президенти Эрон оқибатҳои экологии ҷанг бо марзҳои кишварҳо маҳдуд намешаванд. Олӯдашавии об, ҳаво ва хок метавонад ба минтақаҳои дур аз маҳалли даргирӣ низ паҳн шавад.

Масъуд Пизишкиён ба вазъияти Ғазза ишора карда, харобиҳои ин минтақаро намунаи осеби густурдаи экологӣ номид. Ӯ афзуд, ки барқарор кардани муҳити зисти табиии баъзе минтақаҳо вақти зиёд талаб менамояд.

Президенти Эрон аз ниҳодҳои Созмони Милали Муттаҳид ва созмонҳои молиявии байналмилалӣ хост, ки барои мушаххас кардани ҳаҷми зарари экологӣ, барқарор сохтани минтақаҳои осебдида ва дастгирии кишварҳои аз низоъ зарардида, механизмҳои муассиртар таъсис диҳанд.

Dialog.tj