Гурӯҳи террористии Толибон дар вилояти Дойкундии Афғонистон даҳҳо нафарро барои барпо кардани намози ид дар рӯзи ҷумъа боздошт кардаанд.

Толибон бар хилофи дигар кишварҳои исломӣ намози Иди Қурбонро як рӯз баъд, рӯзи шанбе адо намуданд.

Бар асоси гузориши расонаҳои афғонистонӣ Толибон даҳҳо нафар сокинони вилояти Дойкундии Афғонистон, аз ҷумла имом ва ашхосе, ки рӯзи ҷумъа намози Қурбонро адо кардаандро, боздошт намуданд.

Боздоштҳои гурӯҳӣ барои адои намози ид дар вилояти Дойкундӣ ва ноҳияи Аштарлӣ сурат гирифтааст. Сарчашмаҳои маҳаллӣ тасдиқ намуданд, ки ҳарчанд баъзе аз боздоштшудаҳо баъди чанд соат раҳо шуданд, аммо тақрибан 50 нафар ҳанӯз дар боздоштгоҳи Толибон нигоҳ дошта мешаванд.

Имсол Толибон бар хилофи анъанаи суннатии мардуми Афғонистон ва бисёре аз кишварҳои исломӣ, ба мисли Арабистони Саудӣ ва Ҷумҳурии Исломии Эрон рӯзи шанберо рӯзи Иди Қурбон эълон намуданд. Ин дар ҳоле буд, ки дар аксари кишварҳои исломӣ намози Иди Қурбон ва қурбонӣ рӯзи ҷумъа анҷом дода шуд. Толибон эълон намуданд, ки адои намози ид дар рӯзи ҷумъа нодуруст аст. Ин иқдом боиси норозигии шадиди мардуми Афғонистон шуд.

Дар мухолифат ба иқдоми Толибон дар бархе минтақаҳо, аз ҷумла Дойкундӣ мардум бо пайравӣ аз суннатҳои гузашта ва мувофиқ ба тақвими Арабистони Саудӣ намози Иди Қурбонро барпо намуданд. Ин амал боиси вокуниши шадиди Толибон шуд ва онҳо намозхонон ва руҳониёни маҳаллиро боздошт карданд.

Dialog.tj