Президенти Ҷумҳурии Исломии Эрон Масъуд Пизишкиён дар мулоқот бо муовини Сарвазири Қазоқистон Мурат Нуртлеу гуфт, ки ҳамаи фаъолиятҳои атомии Эрон шаффоф аст ва аз сӯйи Агентии байналмилалии атомӣ низ тасдиқ шудааст. Ӯ дар ин суҳбат таъкид кард, ки Эрон омода аст ҳар навъ бозрасиҳои байналмилалӣ дар муассисаҳои атомияш анҷом дода шавад.

Тибқи иттилои расонаҳои эронӣ Масъуд Пизишкиён бо муовини Сарвазири Қазоқистон дар шаҳри Теҳрон мулоқот намуда ва мардуми Қазоқистонро бо Иди саиди Қурбон табрик гуфтааст ва изҳори умед кардааст, ки ин иди бузург фурсати гаронбаҳо барои таҳкими робитаҳо миёни кишварҳои исломӣ ва густариши ҳамакориҳои ҳамаҷониба мегардад.

Масъуд Пизишкиён бо ишора ба фалсафаи амиқ ва ваҳдатофарини иди Қурбон ва ҳузури бузурги мусалмонон дар ҳаҷ, ин оини мазҳабиро таҷаллии ваҳдати уммати ислом ва намоиши таслим дар баробари иродаи илоҳӣ ва гузаштан аз нафс дониста, гуфт: “Самараи ин гирдиҳамоӣ бояд иродаи муштарак барои таҳкими дӯстӣ ва бародарии миёни миллатҳои мусалмон ва талоши ҳамоҳанг барои иззат ва ифтихори ислом ва уммати исломӣ бошад”.

Масъуд Пизишкиён гуфт, ки Эрон бо кишварҳои исломӣ нигоҳи бародарона дорад ва бар асоси таълимоти исломӣ, миллатҳои мусалмонро бародарони худ медонад.

“Омодагии комил дорем бо тамоми кишварҳои исломӣ, аз ҷумла Қазоқистон дар заминаи густариши ҳамкориҳо табодули таҷрибаҳо ва истифода аз зарфиятҳои муштарак роҳи пешрафт ва рушди устуворро ҳамвор созем”- таъкид намуд Масъуд Пизишкиён.

Президенти Эрон бо ишора ба муштаракоти фарҳангиву таърихии ду кишвар гуфт, ки кишвараш омода аст дар ҳама соҳаҳо робитаҳои худро бо Қазоқистон густариш диҳад. Ба гуфтаи ӯ, ояндаи ин равобит ба иродаи муштарак барои сохтани фардои рӯшан ва сулҳу пешрафт барои минтақа ва ҷаҳон вобастагӣ дорад.

Дар ҷараёни мулоқот Масъуд Пизишкиён дар бахши дигари суханонаш ба музокироти ғайримустақим оид ба Барномаи атомии Эрон бо Амрико ишора намуда, гуфт, ки  “иттиҳомҳо дар мавриди Барномаи сулҳомези атомии Эрон дар ҳолест, ки мо чандин бор ба рӯшанӣ гуфтаем ва дар амал ҳам нишон додаем, ки ҳеч гоҳ дар пайи тавлиди аслиҳаи атомӣ ё силоҳҳои куштори ҷамъӣ набудем ва нестем”.

“Фаъолиятҳои атомии Ҷумҳурии Исломии Эрон комилан шаффоф аст ва Агентии байналмилалии атомӣ чандин маротиба ин масъаларо таъйид кардааст. Мо омодаем таҳти бозрасӣ қарор гирем, аммо маҳрум сохтани миллатҳо аз дастрасӣ ба дониш, технология ва дастовардҳои илмиро ғайри қобили қабул медонем. Зеро ин навъи маҳрумият маънои маҳрум кардани инсонҳо аз неъматҳои илоҳиро дорад ва қобили қабул нест.

Мо сари таъзим фақат дар баробари Худо фуруд овардаем, то дар баробари ғайри Худо сар фуруд наорем. Мо иҷозат намедиҳем, ки дигарон дар бораи сарнавишти миллати мо тасмим бигиранд. Ҷумҳурии Исломии Эрон ҳамеша омодаи шунидани сухани мантиқӣ аст, аммо ҳеҷ гоҳ зӯргӯӣ ва таҳдидро нахоҳад пазируфт”-  гуфт Масъуд Пизишкиён.

Dialog.tj