Созмони ҷаҳонии тандурустӣ бо нашри як гузориш гуфтааст, ки 25 дарсади мардум, аксаран ҷавонону занони Афғонистон тамокӯ истеъмол мекунанд. Бар асоси ин гузориш, аз ҳар чор нафар, як нафар дар Афғонистон тамокӯ истеъмол мекунад.

Созмони ҷаҳонии тандурустӣ ба муносибати Рӯзи ҷаҳонии бидуни тамокӯ ин гузоришро нашр карда, аз ҷомеа хостааст, ки бо ҳам муттаҳид шуда, ба зидди ин падидаи хатарнок мубориза баранд.

Эдвин Сниза Салвадор, намояндаи Созмони ҷаҳонии тандурустӣ дар Афғонистон гуфтааст, ки зарари тамокӯро дар “пушти дурӯғҳои ширин” пинҳон мекунанд ва афзоиши истеъмоли он дар миёни ҷавонписарони Афғонистон боиси нигаронӣ аст.

“Фурсати он фаро расидааст, ки ин раванд қатъ шавад ва наслҳои оянда ҳифз шаванд” – гуфтааст Эдвин Сниза Салвадор.

Ба гузориши Созмони ҷаҳонии тандурустӣ навъи маъмултарини тамокӯ дар Афғонистон “нос” буда, ҳатто аз сӯйи бархе занон ҳам истифода мешавад.

Ин гузориш дар ҳоле нашр мешавад, ки Вазорати тандурустии Афғонистони зери назари гурӯҳи террористии Толибон эълон кард, ки 27 фоизи мардуми Афғонистон нос истеъмол мекунанд.

Dialog.tj