Вазорати корҳои хориҷии Австралия бо нашри як изҳорот аз шаҳрвандони ин кишвар хостааст, ки бо далели таҳдидҳои бузурги террористӣ, одамрабоӣ ва боздоштҳои худрасона аз сафар ба Афғонистон худдорӣ кунанд.

Ин вазорат рӯзи 3-уми июн бо нашри як изҳорот шаҳрвандонашро даъват намуд, ки аз сафар ба Афғонистон худдорӣ кунанд, зеро вазъияти амниятӣ дар ин кишвар хеле нигаронкунанда аст.

Ба гуфтаи Вазорати корҳои хориҷии Австралия хавфи баланди ҳамлаҳои террористӣ ва рабудани одамон дар қаламрави Афғонистон, аз ҷумла дар шаҳри Кобул вуҷуд дорад. Таъкид мешавад, ки дар ҳеч минтақаи Афғонистон наметавон ба амнияти пурра итминон дошт, зеро хатари ҳамлаҳо дар ҳамаи қаламрави ин кишвар густариш ёфтааст.

Ҳамчунин, шаҳрвандони хориҷӣ дар Афғонистон дар муқобили хатари ҷиддии  боздоштҳои худрасона қарор доранд, ки ин нигарониҳоро дар мавриди амнияти шаҳрвандони хориҷӣ боз ҳам афзоиш медиҳад.

Ин ҳушдор аз сӯйи як кишвари ғарбӣ дар ҳоле садо медиҳад, ки бисёре аз кишварҳо ба далели буҳронӣ шудани вазъияти амниятӣ дар Афғонистон аз шаҳрвандонаш хостаанд, ки ба ин кишвар сафар накунанд.

Коршиносони ниҳодҳои байналмилалии амниятӣ мегӯянд, ки вазъи ноором ва ғайриустувори Афғонистон ҳамоно идома дорад ва хушунату беқонуниятӣ имкони дастрасӣ ба ёрии башардӯстонаро маҳдуд ва амнияти сокинонро зери хатар қарор додааст.

Бо назардошти чунин вазъ мақомоти Австралия ба шаҳрвандонаш тавсия додааст, ки ҳушдори расмиро ҷиддӣ гиранд ва то ҳадди имкон аз сафар ба Афғонистон худдорӣ кунанд, зеро вазъияти амниятӣ дар он ҷо ғайриқобили пешгӯӣ ва хеле хатарнок боқӣ мемонад.

Dialog.tj