Ҳукумати Ҳиндустон бо мақсади тарғиб кардани кишоварзии пойдор, иқдомҳои густурдаеро дар сатҳи миллӣ ва маҳаллӣ амалӣ мекунад. Ин иқдомҳо омӯзиши деҳқонҳо, истифода аз технологияҳои муосир дар кори кишоварзӣ ва эҳёи усулҳои суннативу пуштибонии давлатиро дар бар мегирад.

Бар асоси иттилои расонаҳо, ҳукумати Ҳиндустон мақсад дорад, ки то охири соли 2025 10 миллион деҳқонро дар соҳаи кишоварзӣ омӯзиш диҳад. Ин барнома бо мақсади тарғиби кишоварзии пойдор ва истеҳсоли ғизои солим роҳандозӣ мешавад.

Аз 29-ум май то 12-уми июни соли 2025 барномаи миллии “Қотеият барои рушди кишоварзӣ” амал мешавад, ки ҳадафи он густариши ҳамкории деҳқонон ва олимони соҳаи кишоварзӣ мебошад. Дар чорчӯби ин маърака беш аз 8000 коршиноси кишоварзӣ дар 65 000 деҳа ҳузур ёфта, роҳҳои илмӣ ва маҳаллии кишоварзиро омӯзиш медиҳанд.

Ҳукумати Ҳиндустон бо пешниҳоди кумакҳои молиявӣ ва барномаҳое чун “Барномаи миллии истеҳсоли органикӣ” соҳаи кишоварзиро тарғиб мекунад. Мақсади барнома коҳиши истифодаи маводи химиявӣ ва ҳифзи хок ва гуногунии биологӣ мебошад.

Деҳқонони Ҳиндустон ба истифодаи технологияҳое чун кишоварзии оқилона, зеҳни сунъӣ ва таҳлили иттилоот рӯ овардаанд, то ҳосилнокии маҳсулоти кишоварзиро афзоиш дода, ин соҳаро рушд диҳанд.

Дар бархе минтақаҳо, аз ҷумла Сатари дар иёлати Гоа деҳқонон ба эҳёи усулҳои суннатӣ чун “Пуран Шети” машғул мешаванд. Ин усул иборат аз истифодаи таҳшинҳои бой аз моддаҳои ғизоист, ки ҳосилхезии хокро бидуни ниёз ба нуриҳои химиявӣ зиёд мекунад.

Dialog.tj