Масъулони идораи амр ба маъруфи гурӯҳи террористии Толибон дар иқдоми нав дар мулоқот бо коркунони сартарошхонаҳои Афғонистон даъват кардаанд, ки аз ороиши мӯй бо сабки ғарбӣ худдорӣ кунанд.

Онҳо гуфтаанд, ки лӯч кардани як қисми мӯйи сар ва боқӣ гузоштани қисми дигар бо шариате, ки онҳо тасаввур мекунанд, мувофиқат намекунад. Манзури Толибон аз тарошидани як қисми мӯйи сар ва гузоштани қисмати дигари он “шеваи ороиши мӯйи сари Роналдо” ё ба истилоҳ “причоскаи роналдоӣ” аст.

Дар ҳамин ҳол, Вазорати амр ба маъруф ва наҳй аз мункари гурӯҳи террористии Толибон рӯзи душанбе эълон кард, ки Нурмуҳаммад Ҳаққонӣ, муовини ин вазорат бо гурӯҳе аз масъулони сартарошхонаҳо суҳбат карда, меъёрҳои навро ба онҳо гӯшзад кардааст.

Ӯ дар нишаст бо масъулони сартарошхонаҳо гуфт, ки фармони амр бар маъруф ва найҳ аз мункар фақат вазифаи Толибон нест ва аз мардум хост, ки дар корҳои хусусии ҳамдигар дахолат кунанд. Шарифуллоҳ Ҳаққонӣ, як масъули дигари ин вазорати Толибон низ ба зарурти пешгирӣ аз шеваи ороиши мӯй бо сабки ғарбиро таъкид карда, аз масъулони сартарошхонаҳо хостааст, ки бо ин гурӯҳ ҳамкорӣ кунанд.

Дар идомаи маҳдудиятҳо Вазири амр бар маъруф ва найҳ аз мункари Толибон бо пӯшидани шиму кастюм ва бастани галстук мухолифат карда, гуфтааст, ки ин шеваи либоспӯшии ғарбӣ ғайриқонунӣ аст. Ӯ таъкид кардааст, ки мардум вазифадоранд, дастури шариати ин гурӯҳро риоя кунанд.

Вазорати амр ба маъруфи гурӯҳи террористии Толибон тайи ду соли ахир сахт дар талош аст, ки қонунҳои сахтгиронаи эҷодкардаи Толибонро дар Афғонистон амалӣ кунад.

Dialog.tj