Намояндагони Сипоҳи посдорони Эрон бо бархе роҳбарони ҷараёнҳои мухолифи Толибон, аз ҷумла Аҳмад Масъуд ва Атомуҳаммади Нур дидор кардаанд.

Хабаргузории “Ал-Арабия” бо такя ба манобеаш навишт, ки Ҷумҳурии Исломии Эрон дар пайи афзоиши фишорҳои байналмилалӣ ва коҳиши нуфузи муттаҳидони Теҳрон дар минтақа машваратҳои густурдаеро бо мухолифони Толибон оғоз кардааст.

“Вазорати хориҷаи Эрон се чеҳраи саршиноси мухолифони афғон, аз ҷумла Аҳмад Масъуд, раҳбари Ҷабҳаи муқовимати миллӣ, Аттомуҳаммади Нур, раиси пешини вилояти Балх ва Салоҳиддин Раббонӣ, вазири пешини корҳои хориҷии Афғонистонро барои як сафари расмӣ ба Эрон даъват кардааст”- менависад хабаргузории “Ал-Арабия”.

Тибқи иттилои расонаи арабӣ, Аҳмад Масъуд аз Тоҷикистон вориди Теҳрон шуда бо мақомоти баландпояи Сипоҳи посдорон ва Вазорати хориҷи Эрон мулоқот анҷом додааст. Атомуҳаммади Нур дар ҳамин доира бо мақомоти баландпояи Эрон мулоқоти ҷудогона доштаааст. Салоҳиддин Раббонӣ ҳанӯз ба даъвати Эрон вокуниш нишон надодааст.

Манобеи афғонистонӣ ба ин расона гуфтаанд, Аҳмад Масъуд дар ҷараёни сафараш ба Машҳад бо шуморе аз афсарони пешини артиши Афғонистон, ки дар Эрон зиндагӣ мекунанд, мулоқот кардааст.

Аксҳои нашршуда дар саҳифаҳои иҷтимоии бархе аз тарафдорони Аҳмад Масъуд нишон медиҳад, ки ӯ дар шаҳри Машҳади Теҳрон қарор дорад.

Чанд моҳ қабл расонаҳо аз мулоқоти маҳрамонаи мақомоти Сипоҳи посдорони Эрон бо мухолифони Толибон, аз ҷумла Атомуҳаммади Нур, Муҳаммад Муҳаққиқ, Адурашид Дӯстум ва Тоҷмуҳаммади Ҷоҳид дар Туркия хабар дода буданд.

Dialog.tj