Ширкати русии “Инетко Русия” дар шаҳри Қазон бо гуруҳи террористии Толибон шартнома имзо кард ва ба истихроҷи конҳои нафтии Афғонистон машғул хоҳад шуд.

Шартномаи нафтӣ миёни Нуриддин Азизӣ, вазири саноат ва тиҷорати Толибон ва намояндагони ширкати русии “Инетко” ба имзо расидааст.

Вазири саноат ва тиҷорати Толибон Нуриддин Азизӣ дар суҳбат бо Риа Новости гуфт, ки “Созишномаи ҳамкорӣ дар ин замина ба имзо расид. Ин тавофуқ дар нишасти Русия ва ҷаҳони Ислом дар Қазон ба даст омад”.

Дар ҳамин ҳол, Рустам Хабибулин, раиси Маркази тиҷорати Русия дар Афғонистон гуфтааст, ки ширкати “Инетко групп” ковишҳои бештари геологиро анҷом дода, омодааст, ки корҳои пармакуниро оғоз кунад. Ӯ афзуд, ки бар асоси шартнома ин ширкат як корхонаи истеҳсоли нафт бо инфрасохтори лозимиро дар Афғонистон бунёд хоҳад кард. Раиси Маркази тиҷорати Русия дар Афғонистон таъкид кард, ки “ин аввалин тавофуқ дар навъи худ” мебошад.

Дар нишасти форуми Қазон-ҷаҳони Ислом гуруҳи террористии Толибон бо мақомоти Русия панҷ ёддошти тафоҳуми ҳамкориро дар бахшҳои мухталиф имзо кард. Забир Кобулов, намояндаи хоси президенти Русия дар умури Афғонистон чанде қабл гуфт, ки Толибон сафири худ дар Русияро муаррифӣ кардаанд ва баъди баррасиҳо аз сӯйи Вазорати корҳои хориҷии Русия эътиборномааш қабул хоҳад шуд.

Dialog.tj