Ҷавондухтари британиягӣ Астрид Сибер, ки бо як сафари сайёҳатӣ ба Афғонистон рафта буд, мегӯяд, ки Толибон аз ӯ хуб истиқбол намуда, барояш садҳо пешниҳоди издивоҷ додаанд.

Астрид Сибер дар шарҳи сафараш ба Афғонистон гуфтааст, ки баъди бозгашт аз ин кишвар садҳо паёми издивоҷ дарёфт намудааст. Ӯ зикр намудааст, ки дар шабакаҳои иҷтимоӣ аз ӯ ба ҳайси “дилрабои мардуми Афғонистон” ёд мешавад.

Ӯ мегӯяд, ки ҳангоми сафар ба вилояти Қандаҳор дар вақти наворгирӣ дар ҷамъи мардум телефони мобилияшро дӯздидаанд.

Ин ҷавондухтари британиягӣ дар ҳоле аз рафтори хуби Толибон нисбат ба худаш мегӯяд, ки гурӯҳи террористии Толибон ба занону духтарони афғонистонӣ рафтори саркӯбгарона ва хашин доранд.

Бар асоси гузориши ниҳодҳои байналмилалӣ наздик ба 4,5 миллион духтари афғонистонӣ бо сабаби мухолифати Толибон аз мактаб маҳрум шудаанд ва сиёсати занситезонаи ин гурӯҳ зиндагиро барои занони афғонистонӣ сахт намудааст.

Қонуни амр ба маъруфи Толибон садои занонро аврат номида, шунидани онро барои мардон гуноҳ донистааст. Ҳамчунин, ин гурӯҳ гашту гузори занони бидуни маҳрам дар кӯчаву бозорро манъ кардааст.

Бо вуҷуди маҳдудияти сахти Толибон бар зидди занон, вақте сайёҳони хориҷӣ ба ин кишвар сафар мекунанд, аз муносибати хуби Толибон гузориш медиҳанд. Нозирони вазъият мегӯянд, ки бисёре аз ин сайёҳон бо супориши ниҳодҳои амниятии бархе кишварҳо ба Афғонистон сафар карда, аз воқеиятҳо чашмпӯшӣ мекунанд.

Dialog.tj