Дирӯз, 11-уми май дар Канада мусобиқаи UFC 315 доир гашт, ки дар муҳорибаи асосӣ чемпиони вазни ниммиёна Белал Мухаммад ва Ҷек Делла Маддалена барои камарбанди чемпионӣ бо ҳам рақобат карданд.

Пеш аз муҳориба, аксар ба боваре буданд, ки Белал Мухаммад камарбанди чемпиониашро ҳимоя мекунад, вале ин тавр нашуд. Муҳориба 5 раунд идома ёфта, Ҷек Делла Маддалена бо қарори ҳамаи доварон ғолиб дониста шуд ва чемпиони нави UFC дар вазни ниммиёна гардид.

Шавқоварии ин мусобиқа боз дар он буд, ки рақиби навбатии Ислом Махачев, чемпиони UFC дар вазни сабук ва беҳтарин размкор новобаста аз вазн муайян шуд.

Ислом Махачев гуфта буд, ки агар Белал Мухаммад чемпион бимонад, зиддӣ ӯ муҳориба намегузаронад ва дар вазни худаш камарбандашро бори дигар ҳимоя мекунад, вале чун Ҷек Делла Маддалена чемпион шуд, акнун чемпиони вазни сабук барои камарбанди вазни ниммиёна талош хоҳад кард.

Агарчи ҳоло муҳорибаи Ҷек Делла Маддалена ва Ислом Махачев расман эълон нашудааст, вале аллакай ин ду размкор дар шабакаҳои иҷтимоӣ бо ҳам суҳбат карданд ва розигиашонро доданд. Роҳбари ташкилоти UFC Дана Уайт ҳам ба баргузор шудани ин муҳориба ишора кард.

Dialog.tj