Муттаҳидони Русия дар фазои кишварҳои пасошӯравӣ, ки ҳар кадом ҳоло ба истиқлоли комил расидаанд, вобаста ба ҷашни 80-солагии Ҷанги Бузурги Ватанӣ иқдомҳои мушаххасеро рӯйи даст гирифтанд. Аз қадрдонии иштирокчиён ва ширкаткунандагони ақибгоҳ то баргузор намудани паради ботантанаи ҳарбӣ дар маркази пойтахтҳои худ.

Бархе расонаҳои қазоқистонӣ навиштанд, ки ҳукумати Қазоқистон ба муносибати 80-солагии Ғалаба паради ботантанаи ҳарбӣ бо ширкати низомиён дар маркази шаҳри Остона баргузор мекунад. Гуфта мешавад, ки Қазоқистон барои баргузории паради ҳарбӣ маблағ ҷудо намуда, тартиботи муҳимми амниятиро низ роҳандозӣ кардааст.

Омодагӣ ба паради ҳарбӣ, ки рӯзи 7-уми май дар шаҳри Остона баргузор мешавад, миёни шаҳрвандон вокунишҳои мухталиферо ба вуҷуд овардааст. Бархе аз сокинони Остона ба расонаҳо гуфтаанд, ки дар шароити душвори иқтисодӣ ва дар пасманзари ҷанги Украина баргузор намудани паради ҳарбӣ бо хароҷоти ҳангуфт оё ба манфиати кишвари Қазоқистон аст? Қисми дигар бо шуру шараф рӯзи баргузории паради ҳарбиро лаҳзашуморӣ мекунанд ва мегӯянд, ки таҷлил аз ин рӯз ба хотири пос доштани руҳи қурбониёни Ҷанги Бузурги Ватанӣ аст.

Расонаҳои Қазоқистон гузориш доданд, ки аз рӯзи 6-уми май дар кӯчаҳои Остона дар маҳалли Эпитсентр оромӣ ҳукмфармо буд. Мардум бидуни шитоб ба корҳои рӯзмарраи худ машғул буданд ва аз ҳавои офтобии форам ва сайру гашт истифода мекарданд.

Ба хотири баргузории паради ҳарбӣ тадбирҳои шадиди ҳарбӣ дар макони баргузории он ҷорӣ шудааст. Роҳҳо баста ва қисмате аз роҳҳои пиёдагард бо панҷараҳо баста шудааст.

Яке аз сокинони шаҳри Остона гуфтааст,  “Одамоне, ки ба парад меоянд, бояд сиҳату саломат омада, ҳамон тавр низ баргарданд. Агар фикр кунед, ки манъ карданҳо лозим нестанд, ман бо шумо розӣ нестам”.

Се сокини дигар, ки ҳоло бознишаста мебошанд, якдилона гуфтанд, ки баргузории паради ҳарбӣ лозим аст. Ба гуфтаи онҳо, сабаби асосӣ дар он аст, ки бояд хотираи ҳалокшудагон дар ҷанг пос дошта шавад.

“Ҷанги Русия ва Украина ин масъалаи дигар аст. Ин ба 80-солагӣ рабт надорад. Он ҷо таърихи дигар аст, муносибатҳои дигар. Мо худ намедонем, ки бо мо ҷумҳуриҳои ҳампаймон дар оянда чӣ мешавад. Дуруст мекунем, ки парадро мегузаронем”- гуфт яке аз занони шаҳри Остона.

Сокинони шаҳри Остона дар як масъала- ҷудо кардани маблағ барои паради ҳарбӣ ҳамфикр буданд ва мегӯянд, ки ҳукумат метавонист маблағи камтар ҷудо кунад.

“Миллиардҳо ҷудо намуданд ва мегӯянд, ки мо наметавонем парадро бинем. Аз як тараф дуруст аст, ки ба чунин корҳо маблағ медиҳанд, аммо мардум бояд нишон диҳад, ки маблағҳо ба куҷо сарф шудаанд. Ба мо мегӯянд, аз тиреза  ё балкон бинед. Ин чӣ маъно дорад? Ман кӯшиш мекунам ба майдон бароям, агар натавонам пас маҷбур мешавам аз балкон бинам”- мегӯяд як нафақахӯр.

Бархе сокинони шаҳри Остона мегӯянд, ки фоидае дар баргузории паради ҳарбӣ намебинанд: “Афсӯс, ки ҳама роҳҳоро мебанданд. Ман наметавонам ба хона ба осонӣ расам. Парадро намебинам, ман кор мекунам. Ғалаба карданд, карданд. Муҳим ин аст, ки онро дар дил ва хотир нигоҳ дорем”.

Dialog.tj