Расонаҳои афғонистонӣ гузориш доданд, ки Обида ном як духтар дар вилояти Ғӯри Афғонистон барои раҳоӣ аз издивоҷ бо як Толиб худкушӣ кардааст. Ба гуфтаи манобеъ, ин ҳодиса рӯзи якшанбе рӯй додааст. Духтар ҳангоме, ки Толибон мехостанд ӯро бо зӯр баранд, ба зиндагии худ поён додааст.

Тибқи иттилои расонаҳо духтар бошандаи деҳаи Дарзоби Нилии ноҳияи Тӯраи вилояти Ғӯри Афғонистон аст.

Бар асоси иттилоъ Ҳоҷӣ Муҳаммад Раҳмонӣ яке аз афроди гурӯҳи террористии Толибон дар ноҳияи Тӯра мехост ин духтарро бидуни розигии ӯ ва бо зӯри силоҳ ба никоҳи маҷбурии бародараш дарорад. Духтар бо ин амри Толибон мухолифат карда, ягона роҳи халосиро дар худкишӣ дидааст.

Баъди ба қудрат расидани гурӯҳи террористии Толибон Ҳоҷӣ Муҳаммад Раҳмонӣ тӯли чор сол талош кардааст, ки ин духтарро ба издивоҷи бародараш дарорад, вале духтар ва хонаводааш ин хости қумондони Толибро рад мекардаанд.

Тибқи иттилоъ, хонаводаи духтар ба додгоҳи маҳаллии Толибон муроҷиат кардааст ва додгоҳ дархости издивоҷи маҷбуриро рад кардааст. Бо вуҷуди он қумондони Толиб бо зӯр хостааст, ки духтарро ба ақди бародараш дарорад.

Узви гурӯҳи Толибон рӯзи якшанбе бо чанд нафар афроди мусаллаҳ ба хонаи духтар ҳамла карда, падару бародарашро дар масҷид зиндонӣ мекунанд. Толибон баъди зиндонӣ кардани падар ва бародари духтар мехостанд, ки ӯро бо зӯр бо худ баранд, аммо духтари ҷавон худкушӣ кардааст.

Духтар баъди ҳамлаи Толибон ба хонаашон худро оташ задааст. Навори худкушии духтар ба дасти бархе расонаҳои афғонистонӣ расидааст.

Дар пайи ин ҳодиса фаъолони ҷомеаи шаҳрвандии Афғонистон маъракаи ҳимоят аз ҳуқуқи занонро дар шабакаҳои иҷтимоӣ роҳандозӣ кардаанд.  Гулчеҳра Яфталӣ, яке аз фаъолони зан дар шабакаи иҷтимоии “Х” навишт: “Духтароне чун Обидаи ғӯрӣ худро ба оташ мекашанд, аммо тан ба издивоҷ бо қотилони падар, бародар ва хоҳаронашон намедиҳанд”.

Dialog.tj