Созмони Милали Муттаҳид бо нашри як гузориш ҳушдор додааст, ки буҳрони башардӯстонаи Афғонистон дар сояи саркӯби системавии ҳуқуқи занон шиддат ва паҳнои бештар ёфтааст.

Созмони Милали Муттаҳид дар гузориши “Занону духтарони дар ҳолати буҳрон”, ки бар асоси додаҳои 34 вилояти Афғонистон таҳия шудааст, таъкид мекунад, ки маҳдудиятҳои ҷоришуда аз сӯйи Толибон қобилияти занонро барои дастрасӣ ба таҳсилот, хизматрасониҳои тиббӣ, кумакҳои башардӯстона ва имкониятҳои рӯзгузаронӣ коҳиш додааст.

Бар асоси ин гузориш маҳдудиятҳои шадиди Толибон бар зидди занон ва духтарон на фақат боиси нақзи ҳуқуқи башари онҳо шудааст, балки буҳрони амалии Афғонистонро амиқтар кардааст. Ин гузориш меафзояд, ки манъ шудани кори занон дар ниҳодҳои имдодрасон сабаби маҳдуд гардидани хизматрасониҳои башардӯстона, бахусус барои занон ва кӯдакон шудааст.

Дар натиҷаи маҳдудиятҳо 90 фоизи барномаи дастгирии занон ё қатъ шудаанд ё бо маҳдудиятҳои ҷиддӣ рӯ ба рӯ гардидаанд. Бар асоси ин таҳқиқот 70 дарсади занон дар саросари Афғонистон гуфтаанд, ки бино ба сабаби маҳдудиятҳо дигар кумакҳои ҳаётӣ, ба мисли маводи ғизоӣ ва хидматҳои тиббӣ анҷом дода намешавад.

Созмони Милали Муттаҳид ҳушдор додааст, ки бисёре аз оилаҳои зери сарпарастии занон, ки ба воситаи кумакҳои башардӯстона ё кор дар бархе ниҳодҳо рӯз мегузарониданд, ҳоло дар фақри шадид ба сар мебаранд.

Гузориш ҳамчунин, ба коҳиши шадиди дастрасӣ ба хидматҳои тиббӣ, бахусус барои занони ҳомила ва кӯдакон ишора намуда, гуфтааст, ки сатҳи маргу мири қобили пешгирӣ дар ҳоли афзоиш аст.

Дар ин гузориш СММ ҳушдор медиҳад, ки дар сурати идома ёфтани маҳдудиятҳо Афғонистон ба хатари фурӯпошии башарии фарогир рӯ ба рӯ хоҳад шуд, ки миллионҳо нафарро ба самти гуруснагӣ, бехонагӣ ва беморӣ мекашонад.

Таъкид шудааст, ки занон нақши асосии шиносоии ниёзмандон, расонидани хидматҳо ва ҳимоят аз қишрҳои осебпазир доранд ва ҳазфи онҳо аз равандҳои кумакрасонӣ оқибатҳои фоҷеабор ба бор хоҳад овард.

Бахши занони Созмони Милали Муттаҳид ба зарурати афзоиши фишорҳои дипломатӣ ба Толибон барои лағви маҳдудиятҳои ҷоришуда бар зидди занон таъкид карда, хостори истифодаи роҳкорҳои эҷодкорона, аз ҷумла пуштибонии ғайримустақим аз занон ва татбиқи барномаҳои махсус барои ҷомеаҳои занон шудааст.

Созмони Милали Муттаҳид дархост кардааст, ки кумакҳои молиявии бештар барои барномаҳои башардӯстона дар Афғонистон ҷудо карда шавад, то шиддати буҳрони башарӣ дар Афғонистон коҳиш ёбад. Дар фарҷоми гузориш таъкид шудааст, ки бидуни ҳузури занон дар арсаҳои иҷтимоӣ ва иқтисодӣ Афғонистон тавони паси сар кардани буҳрони кунуниро надорад.

Dialog.tj