Сергей Лавров, вазири корҳои хориҷии Федератсияи Русия дар хусуси бозгашти зерсохторҳои низомии НАТО ба Афғонистон ҳушдор дода, эҳтимолан чунин иқдомҳро хатарнок номид.

Хабаргузории “ТАСС” гузориш дод, Сергей Лавров кишварҳои ғарбиро барои кӯшиш дар боз гардонидани ҳузури худ дар ин кишвар баъд аз ба қудрат расидани гурӯҳи террористии Толибон танқид кард.

“Чунин кӯшишҳо метавонанд бомбаи навбатии соатшумор эҷод кунанд, ки эҳтимолан фатилаи кӯтоҳ дорад” – гуфт Сергей Лавров.

Сергей Лавров рӯзи чоршанбе дар суҳбат бо хабарнигорон равандҳои нави Давҳа бо ибтикори Созмони Милали Муттаҳидро интиқод карда, гуфт, ки “Ғарб шакли нави машваратҳоро ба воситаи котиботи Созмони Милали Муттаҳид оғоз кард, ки онро формати Давҳа меноманд”.

Сергей Лавров афзуд, ки идораи Кобул аз сӯйи Толибон ҳақиқат аст, ки бояд барои пешбурди сиёсати амалгароёна ва дур аз идеология ба он рӯ ба рӯ шуд.

Ин нигаронии Федератсияи Русия дар ҳолест, ки Доналд Трамп, президенти Иёлоти Муттаҳидаи Амрико чандин бор аз гирифтани пойгоҳи Багром ва ҳузури низомии Амрико сухан гуфтааст. Доналд Трамп ҳамчунин, Ҷо Байден, президенти пешини Амрикоро барои тарк кардани Багром интиқод намуда, гуфт, ки ҳоло Чин ин пойгоҳро идора мекунад.

Dialog.tj