Расонаҳои афғонистонӣ хабар доданд, ки мақомоти амниятии Тоҷикистон дар рӯзҳои ахир 47 паноҳҷӯи афғонистониро депорт кардаанд.

Манбаъҳои маҳаллӣ дар шаҳри Ваҳдат ба расонаҳои афғонистонӣ хабар додаанд, ки рӯзи душанбе 47 паноҳҷӯи афғонистонӣ аз ҷониби неруҳои амниятии Тоҷикистон маҷбуран депорт шудаанд. Ин паноҳҷӯён асосан ронандагон ва соҳибони таксӣ дар шаҳри Ваҳдат будаанд ва санадҳои расмии паноҳандагии Коммисариати олии СММ оид ба паноҳандагонро дар ихтиёр доштаанд.

Тибқи гуфтаи як паноҳҷӯ ин паноҳҷӯёни афғонистонӣ ба маркази амнияти шаҳри Ваҳдат даъват шудаанд ва ҳуҷҷатҳои онҳо мусодира гардида, бо ду мошин ба марз интиқол дода шудаанд. Ҳамчунин, бархе дигар аз паноҳҷӯёни афғонистонӣ, ки барои харид ба марказҳои савдо рафта буданд, аз сӯи неруҳои амниятӣ боздошт ва ба Афғонистон фиристода шудаанд.

Ин иттилоъ аз сӯйи расонаҳои афғонистонӣ дар ҳоле нашр мешавад, ки мақомоти амниятии Тоҷикистон бидуни далел ва шавоҳиди айнӣ наметавонанд паноҳҷӯёнро депорт кунанд. Қаблан, як гурӯҳ аз паноҳҷӯёни афғонистонӣ барои риоя накардани қоидаҳои будубоши паноҳандагӣ, барангехтани баҳсҳои мазаҳабӣ ва таблиғоти динӣ аз Тоҷикистон депорт шуда буданд.

Паноҳҷӯёни афғонистонӣ асосан дар шаҳри Ваҳдат зиндагӣ мекунанд ва мақомоти Тоҷикистон гуфтаанд, ки барои зиндагӣ шароити беҳтаринро фароҳам кардаанд. Бархе ниҳодҳои байналмилалӣ чанде қабл аз иқдомҳои муҳимми Тоҷикистон барои пуштибонии паноҳҷӯёни афғонистонӣ истиқбол намуда буданд.

Тоҷикистон дар муқоиса бо дигар кишварҳо, аз ҷумла Эрон, Покистон, Туркия ва Олмон нисбат ба паноҳҷӯёни афғонистонӣ сиёсати нармтарро истифода кардааст.

Dialog.tj