Сардори Хадамоти иктишофи хориҷии Федератсияи Русия Серегей Наришкин гуфт, ки ниҳодҳои ҷосусии кишварҳои аврупоӣ роҳҳои кумак ба неруҳои зидди ҳукумати Афғонистонро ҷустуҷӯ мекунанд ва мехоҳанд вазъият дар Афғонистонро ноором нигоҳ доранд.

Сергей Наришкин дар шаҳри Бокуи Озарбойҷон дар нишасти “Афғонистон: пайванди минтақавӣ, амният ва рушд” ширкат ва суханронӣ намуд. Ӯ дар ин нишаст ба масъалаи ҳамкорӣ бо гурӯҳи террористии Толибон пардохта, таъкид кард, ки тағйироти мусбат дар робитаи Русия ва Толибон ба вуҷуд омадааст.

“Маҳз кишварҳои аврупоӣ дороиҳои Афғонистонро масдуд кардаанд, таҳримҳо бар зидди Кобулро бекор намекунанд ва хадамоти махсуси онҳо роҳҳои пуштибонӣ аз неруҳои зиддиҳукуматиро меҷӯянд” – афзуд Сергей Наришкин.

Ӯ яке аз сабабҳои ба расмият шинохта нашудани Толибонро ба талошҳои кишварҳои Аврупо ба ноором нигоҳ доштани Афғонистон вобаста дониста, гуфт, ки  ба расмият шинохтани Толибон ногузир аст.

 Ҳамчунин, Сергей Наришкин аз ҳамкорони худ аз Тоҷикистон, Ӯзбекистон ва Қазоқистон барои ҳамкории муштарак дар ошкор ва безарар кардани таҳдидҳои гурӯҳҳои террористӣ изҳори сипос намуд.

Dialog.tj