Гурӯҳи террористии Толибон Надима Нур, маъруф ба Патингара Каки - як зани фаъоли шабакаҳои иҷтимоиро чанд рӯз қабл боздошт кардааст. Дар ин хусус расонаҳои афғонистонӣ хабар медиҳанд.

Сабаби боздошти Надима Нур то ҳол маълум нест, вале қаблан низ гурӯҳи террористии Толибон ӯро боздошт карда буданд.

Надима Нур, ки дар фазои маҷозӣ фаъолиятҳои густурда дорад, ахиран паёми видеоии худро нашр кард. Дар ин паём ӯ аз Толибон хоста буд, ки бо мардум бо меҳрубонӣ рафтор намоянд.

“Қурбони Шумо шавам. Дилам ба ҳоли мардуми кишварам ва ба ҳоли шумо месӯзад, ки ин суханонро мегӯям. Шумо, ки бо ин ренҷерҳо мегардед, силоҳҳои худро ин гуна ба сӯйи мардум нагиред. Фардо мумкин аст, ки ҳамин силоҳ ба сӯи худатон тир андозад. Агар дилҳои мардумро ба даст оред, муҳаббат миёни мо ва шумо бештар мешавад” – гуфтааст дар паёми видеоии худ Надима Нур.

Бар асоси иттилоъ, Надима Нур масъули як муассисаи хайриявие мебошад, ки дар бахши омӯзиши духтарон дар Афғонистон фаъолият мекунад. Ӯ дар соли 2019 аз Канада ба Афғонистон омада буд.

Боздошти Надима Нур дар ҳолест, ки қаблан низ фаъолони ҳуқуқи занон, ҳомиёни ҳуқуқи башар, рӯзноманигорон ва ҳатто баъзе аз неруҳои амниятии ҳукумати собиқ аз сӯйи Толибон боздошт, шиканҷа ва ҳатто нопадид шудаанд. Толибон бар зидди расонаҳо ва фаъолони расонаӣ маҳдудиятҳои шадидро ҷорӣ кардаанд. Нашри акс ва тасвир дар аксари расонаҳои минтақавии Афғонистон манъ шудааст.

Dialog.tj