Суди Олии Федератсияи Русия рӯзи панҷшанбе бо дархости Прокуратураи генералии ин кишвар барои муваққатан хориҷ кардани Толибон аз рӯйхати созмонҳои террористӣ мувофиқат намуд. Прокуратураи генералии Русия қаблан аз Суди Олии Русия хоста буд, ки гурӯҳи террористии Толибонро аз феҳристи гурӯҳҳои террористӣ хориҷ кунад.

Хабаргузории “РИА Новости” дар хусуси баргузории суд дар пушти дарҳои баста хабар дода, афзудааст, ки дар ҷараёни муҳокимаи парванда намояндаи Толибон низ ҳузур доштанд.

Прокуратураи генералии Русия бо нашри изҳорот гуфт, асоси ҳуқуқии ин дархост тағйироте буд, ки дар моҳи декабри соли гузашта дар қонунҳои мурофиавии маъмурӣ ва мубориза бо терроризм ворид шуд.

“Бо таваҷҷуҳ ба маълумоти пешниҳодшуда аз сӯйи ниҳодҳои вобаста суд ба хулоса омад, ки далелҳои пешниҳодшудаи Прокуратура асоси воқеӣ доранд ва ҳукми боз доштани мамнуъияти Толибон содир гардид” - зикр шудааст дар изҳорот.

Судя гуфт, ки қарор ба таври фаврӣ иҷрошаванда аст ва эҳтимолан дар зарфи як моҳ аз санаи содир шудани он дар Шурои таҷдиди назари Суди Олии Федератсияи Русия мавриди бознигарӣ қарор гирад.

Моҳи январи ҳамин сол Владимир Путин фармонеро имзо кард, ки бар асоси он имкони хориҷ намудани муваққатии гурӯҳҳои террористӣ аз феҳристи гурӯҳҳои террористӣ имконпазир мегардад. Толибон аз соли 2003 ба феҳристи гурӯҳҳои террористии Русия шомил карда шуданд.

Dialog.tj