Аҳмад Масъуд, роҳбари Ҷабҳаи муқовимати миллии Афғонистон гуфт, ирода ва хоҳиши мардуми Афғонистон барои мубориза бо Толибон бештар шудааст. Ӯ гуфт, ки паёмҳои ҳамкории мардум барои муқобила бо Толибон ба ӯ рӯз то рӯз бештар мерасанд.

Аҳмад Масъуд рӯзи душанбе дар маросими солгарди дуюми кушта шудани аъзои барҷастаи Ҷабҳаи Озодӣ дар Соланг гуфт: “Ягон режим бидуни пуштибонии мардум пойдор намемонад ва тағйирот ҳатман фаро хоҳад расид”.

Ӯ гуфт, рӯзеро мебинам, ки озодӣ, адолат ва мардумсолориро дар паҳлӯи мардумамон ҷашн гирем. Ӯ Толибонро ба “зулм ва ваҳшат” муттаҳам кард ва гуфт, ки ҷараёнҳои мухолифи Толиб бояд муттаҳид шаванд.

“Соат дар дасти Толибон аст, вале замон дар дасти мардуми Афғонистон аст”- афзуд Аҳмад Масъуд.

Аҳмад Масъуд ҳушдор дод, ки ҳеч низом бидуни пуштибонии мардум устувор намемонад ва рақобатҳои тактикӣ ва геополитикии минтақа ва ҷаҳонӣ наметавонад бақои режими Толибонро таъмин кунад. Ӯ аз ҳаракатҳои зиддитолибонӣ хост, ки “фиреби тавтиаҳои душман барои барангехтани эътилоф бар асоси қавият, ҷуғрофиё ва вилоят” –ро нахӯранд ва ба ваҳдат фикр кунанд.

Dialog.tj