Вазири корҳои хориҷии гурӯҳи террористии Толибон Амирхон Мутаққӣ, ки барои адои ҳаҷ ба Арабистони Саудӣ сафар карда буд, аз сӯйи мақомоти ин кишвар, аз ҷумла Вазорати корҳои хориҷии Арабистони Саудӣ мавриди истиқбол қарор нагирифтааст. Тибқи иттилои расонаҳо, дар ҷараёни сафари ҳаҷ Амирхон Мутаққӣ қасд дошт, ки бо мақомоти олии Вазорати корҳои хориҷии Арабистони Саудӣ мулоқот кунад, вале ҳеч мақоми Арабистон ҳозир ба мулоқот ва дидор бо ин вазири Толибон нашудааст.

Манобеи назик ба Толибон ба расонаҳо гуфтаанд, бо вуҷуди талошҳои дипломатии намояндагони сафорати Толибон дар Арабистони Саудӣ мақомоти ин кишвар ҳайати гурӯҳи Толибонро нодида гирифтаанд.

Бар асоси иттилои расонаҳои Афғонистон Амирхон Мутаққӣ зиёд умедвор будааст, ки аз сӯйи Вазорати корҳои хориҷии Арабистони Саудӣ мавриди истиқболи гарм қарор мегирад, вале ба ӯ “рӯйи хуш” нишон надодаанд. Амирхон Мутаққӣ бо вуҷуди чанд рӯзи иқомат дар Арабистони Саудӣ муваффақ нашуд, ки бо ҳеч як аз мақомоти Арабистони Саудӣ мулоқот намояд.

Бар асоси иттилоъ, мақомоти Арабистони Саудӣ барои иҷрои маросими маҳзабӣ тадбирҳои машшахас андешида буданд ва гурӯҳе вазири Толибонро роҳнамоӣ мекард, вале дар сатҳи дипломатӣ ҳамкорие сурат нагирифтааст. Ин амали Арабистони Саудӣ дар муқобили Толибон бо сабаби сиёсати “сарду эҳтиёткорона” сурат гирифтааст.

Гурӯҳи террористии Толибон баъди ба қудрат расидан ба шиддат дар блокадаи ҷаҳонӣ қарор гирифтаанд. Бисёре аз кишварҳо ва созмонҳои ҷаҳонӣ ин гурӯҳро расман ба расмият нашинохтаанд. Созмони Милали Муттаҳид ва ҳатто бархе кишварҳое, ки бо Толибон робитаҳои дипломатӣ барқарор кардаанд, шарти барасмиятшиносиро ба ташкили ҳукумати фарогир ва риояи ҳуқуқи башар ва ҳуқуқи занон вобаста кардаанд.

Dialog.tj