Намояндаи Созмони Милали Муттаҳид бо такя ба таҳқиқоти Бонки ҷаҳонӣ эълон кард, ки маҳдудиятҳои ҷорӣ кардани Толибон бар зидди таҳсил ва кори занон метавонад ҳар сол ба иқтисоди Афғонистон 1,4 миллиард доллар зарар ворид кунад.

UNAMO, дафтари намояндагии Созмони Милали Муттаҳид дар Афғонистон гуфт, ки амалӣ намудани қонуни “Амр бар маъруф” –и Толибон сабаби буҳронӣ шудани иқтисод дар Афғонистон шудааст.

Ин ниҳоди СММ рӯзи панҷшанбе бо нашри гузорише дар хусуси паёмадҳои иқтисодии қонуни “Амр ба маъруф” изҳори назар кардааст. UNAMO эълон кард, ки Толибон ҳамчун як қисми кӯшишҳояшон барои бозсозии ҷомеаи Афғонистон ва созгор намудани он бо дидгоҳҳои идеологӣ қонуни “Амр бар маъруф”-ро қабул ва татбиқ намудаанд. Ин ниҳоди СММ мегӯяд, ки Толибон кӯшиш мекунанд низоми “холис”-и исломии мавриди назарашонро дар саросари Афғонистон густариш диҳанд.

Бар асоси гузориши UNAMO мардон, занон, ақалиятҳо ва ҷавонон дар саросари кишвар ба таври мухталиф аз амалӣ шудани ин қонун осеб дидаанд. Ин таъсир бештар бо нақзи дахолати шахсӣ, ҳаёти хусусӣ ва маҳдуд кардани фаъолиятҳои иқтисодӣ ҳамроҳ будааст.

Дафтари Созмони Милали Муттаҳид дар Афғонистон гуфтааст, ки “муҳтасиб”-ҳои Толибон салоҳияти фарогир барои “боздошти худсарона ва мусодираи амволи вайронкунандагон”–и қонуни мазкурро доранд. Дафтари СММ махсусан ба маҳдудиятҳои таҳмилшудаи қонуни “Амр бар маъруф” бар зидди занону духтарон ишора мекунад, ки шомили маҳдудият дар дастрасӣ ба ҷойҳои ҷамъиятӣ, шеваи пӯшиш ва сафари бидуни маҳрам мебошад. UNAMO таъкид мекунад, ки дастрасии занон ба хизмарасонии занон ба хадамоти тиббӣ низ бинобар манъ кардани сафари бидуни маҳрам маҳдудтар шудааст. Бархе кормандони зан дар бахши тиб гуфтаанд, ки бо сабаби надоштани маҳрам иҷозаи ворид шудан ба ҷойи корашонро надоранд.

UNAMO гуфтааст, ки маҳдудиятҳои ҷоришуда сабаби тақвияти фарҳанги тарсу пинҳонкорӣ шудааст.

Dialog.tj