Расонаҳо хабар доданд, ки 7 нафар узви гурӯҳи тиббие, ки Диего Армандо Марадона – ситораи маъруфи футболи ҷаҳонро табобат мекарданд, ба гумони саҳлангорӣ дар табобат дар суд муҳокима хоҳанд шуд. Гуфта мешавад, ки ин 7 нафар дар рӯзҳои охири ҳаёташ, ситораи машҳури футбол – Диего Марадонаро нигоҳубин мекарданд.

Нахустин муҳокимаи судии 7 нафар пизишки муттаҳам дар ҳафтаи ҷорӣ дар Буэнос-Айрес, пойтахти Аргентина оғоз мешавад.

Гуфта мешавад, ки беш аз 100 нафар, аз ҷумла аъзои оилаи Диего Марадона ва табибоне, ки дар давраҳои мухталиф ӯро табобат кардаанд, ҳамчун шоҳид дар суд шаҳодат хоҳанд дод. Муҳокима то тобистони соли ҷорӣ идома меёбад.

7 нафар ба он гумонбар ҳастанд, ки дар вақти табобати Диего Марадона қарорҳое қабул кардаанд, ки боиси марги ӯ шудааст. Мақомоти Аргентина қаблан низ гуфта буданд, ки дар табобати ӯ табибон саҳлангорӣ кардаанд. Дар сурати исботи ин иттиҳом, гумонбарон аз 8 то 25 сол зиндонӣ хоҳанд шуд.

Диего Марадона, ки солҳои тӯлонӣ бо таъсири манфии истеъмоли кокаин ва машрубот мубориза мебурд, моҳи ноябри соли 2020 дар синни 60-солагӣ аз олам чашм пӯшид. Ӯ қаблан бинобар сабаби пайдо шудани лахтаи хун дар мағзи сар, ҷарроҳии мағзи сарро пушти сар гузошта буд. Марги ӯ дар вақти хуруҷи бемории Ковид-19 рӯй дода буд.

Dialog.tj