Мақомоти Русия мегӯянд саҳти бекорӣ дар ин кишвар ба 2,% расидааст. Ин дар ҳолест, ки президенти ин кишвар Владимир Путин камбуди неруи корро барои иқтисодиёти Русия як мушкили бузург арзёбӣ кард.

Рӯзи сешанбе вазири иқтисоди Федератсияи Русия таъкад кард, ки барои ҷуброн намудани камбуди неруи корӣ дар пайи ҷалби муҳоҷирони корӣ аз кишварҳои осиёӣ, бахусус Мянмар мебошанд.

Дар айни ҳол, шаҳрвандон аз кишварҳои Шӯравии пенин қисми асосии неруи корӣ дар Русияро ташкил медиҳанд.

Хабаргузории “Интерфакс” ба нақл аз вазири иқтисоди Федератсияи Русия Максим Решетников навишт: “Мо набояд танҳо ба кишварҳое, ки ба ҷалби муҳоҷирон аз онҳо одат кардаем, муҳдуд шавем.

Мо бояд ба кишварҳои нав назар андозем, зеро дар ҷаҳон кишварҳое ҳастанд, ки ба таври фаъол ва огоҳона неруи кори худро ба хориҷа мефиристанд. Мо бояд барои ин омода бошем.”

Вазири иқтисоди Федератсияи Русия эълон кард, ки ин кишвар дар айни замон дар ҳоли гуфтугӯ бо Мянмар мебошад. Кишваре, ки тақрибан 6 миллион нафар аз ҷамъияти 55 миллиониаш дар хориҷа кор мекунанд.

“Мо комилан дарк мекунем, ки бидуни танзими дурусти муҳоҷират таъмин намудани неруи корӣ барои иқтисоди кишвар бисёр душвор хоҳад буд. Ин масъалаҳоро бояд ба таври рӯшан баррасӣ карда, дар бораи он гуфтугӯ кунем”- таъкид кардааст Максим Решетников.

Ин дар ҳолест, ки рӯзи сешанбе Владимир Путин дар Кремл бо Мин Аун Хлайн, роҳбари низомӣ ва сарвари ҳукумати Мянмар мулоқот кард.

Кишварҳои Русия ва Чин аз ҳукумати низомии Мянмар ҳимоят мекунанд. Дар Шурои амнияти СММ ин ду кишвар қатъномаи Шурои СММ дар хусуси поймолшавии ҳуқуқи инсон дар Мянмарро вето карда буданд.

Гуфта мешавад, ки бахши саноати дифоии Русия ва бахшҳои ғайринизомии ин кишвар ба камбуди неруи корӣ шадидан рӯ ба рӯ шудаанд. Илова ба ин, бо фиристодани даҳҳо ҳазор сарбози рус ба Украина дар моҳи феврали соли 2022 садҳо ҳазор нафар ин кишварро тарк кардаанд.

Dialog.tj