Биноба ба иттилои Маркази миллии тестии назди Ҳукумати Ҷумҳурии Тоҷикистон даври асосӣ бақайдгирии довталабон барои иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ оғоз шуд.

Манбаъ мегӯяд, ки барои бақайдгирии довталабон имсол дар 43 шаҳру ноҳияи мамлакат 47 нуқтаи доимӣ ва дар 17 шаҳру ноҳияи дигар нуқтаи сайёр фаъол гардиданд.

Гуфта мешавад, ки даври якум ё асосии бақайдгирӣ то 30-уми апрел идома меёбад, вале ин охири кор нест. Тибқи тартиби наве, ки аз ҷониби Ҳукумати мамлакат тасдиқ гардидааст, имсол якчанд даври бақайдгирии довталабон гузаронида мешавад. Баъд аз бақайдгирии довталабон дар даври асосӣ, марҳилаҳои  иловагии он моҳи июн, моҳи сентябр ва аз 29-уми октябр то 7-уми декабр гузаронида мешаванд.

Давраи бақайдгирӣ барои шомил шудан ба макотиби миёнаи касбӣ ё олӣ хеле муҳим буда, имкон медиҳад, ки довталаб дар имтиҳонҳои дохилшавӣ иштирок намояд. Мувофиқи тартиби муқарраргардида, бақайдгирӣ бо ҳузури довталаб ва хоҳиши ӯ, новобаста аз ҷойи истиқоматаш дар ҳар кадоме аз нуқтаҳои бақайдгирии шаҳру ноҳияҳои интихобгардидаи мамлакат гузаронида мешавад.

Ёдовар мешавем, ки аз соли 2014 инҷониб, довталабон тавассути Маркази миллии тестӣ барои дохил шудан ба муассисаҳои таълимӣ имтиҳон месупоранд.

Dialog.tj