Вазорати маориф ва илми Ҷумҳурии Тоҷикистон бо мақсади баланд бардоштани мақому мартабаи олимону омӯзгорон дар ҷомеа, рушди тафаккури техникӣ, навоварӣ ва эҷодкорӣ ва тайёр кардани кадрҳои илмӣ дар муассисаҳои таълимию илмӣ озмуни ҷумҳуриявии «Олими сол»-ро эълон кард.

Тибқи иттилои Вазорат озмуни мазкур миёни омӯзгорон ва олимони муассисаҳои таҳсилоти олии касбӣ ва илмии Ҷумҳурии Тоҷикистон аз рӯйи самтҳои зерин гузаронида мешавад: равияи фанҳои геология, химия, биология, экология, география; равияи фанҳои риёзӣ; равияи фанҳои физика, астрономия; равияи фанҳои техникӣ; равияи фанҳои технологӣ; равияи фанҳои тиббӣ ва фармасевтӣ; равияи фанҳои иқтисодӣ; равияи фанҳои таърих, ҳуқуқ ва сиёсатшиносӣ; равияи фанҳои фалсафа, сотсиология, диншиносӣ, психология; равияи фанҳои филология, лингвистика, журналистика, фарҳангшиносӣ.

Гуфта мешавад, ки дар озмуни «Олими сол» олимон ва омӯзгороне, ки дорои дараҷаи илмӣ мебошанд, ҳуқуқи иштирок карданро доранд.

Dialog.tj