Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе Рустами Эмомалӣ, пули хиёбони Исмоилӣ Сомонӣ, воқеъ дар назди Донишгоҳи миллии Тоҷикистон, минтақаи маъруф ба “Ҷазира”-ро, баъди навсозӣ ва таъмир ба истифода доданд.

Президенти Ҷумҳурии Тоҷикистон муҳтарам Эмомалӣ Раҳмон ва Рустами Эмомалӣ, раиси шаҳри Душанбе рӯзи 5-уми декабр аз корҳои анҷомёфтаи навсозии пули мошингард дар болои дарёи Душанбе шинос шуданд. Дар ин хусус, Дафтари матбуоти президенти Ҷумҳурии Тоҷикистон хабар медиҳад.

Гуфта шудааст, ки корҳои азнавсозии пул аз соли 2020 оғоз гардида, бо тарҳи муосир ва сифати баланд ба анҷом расидааст. Таъкид гардид, ки пули мазкур дар замони Шӯравӣ сохта шудааст ва бо гузашти замон ду шафати он ба таъмиру навсозӣ ниёз пайдо карда буд.

“Барои таъмини устуворӣ дар иншоот нахуст аз ду канори пули мошингузар сутунпояҳои бетонӣ бунёд шуда, сипас болои он бо панҷараҳои мунаққаши оҳанӣ бо риояи унсурҳои меъмории милливу ҷаҳонӣ оро дода шудааст” – зикр мекунад Дафтари матбуоти президенти Ҷумҳурии Тоҷикистон.

Ҳамчунин, Дафтари матбуоти президент иттилоъ медиҳад, ки аз хиёбони Исмоили Сомонӣ то буриши хиёбони Сино дар масофаи 3 километр бо истифода аз лампаҳои каммасрафи барқӣ корҳои равшанинамоӣ дар сатҳи баланд ба анҷом расонида шудааст.

Dialog.tj