Маҷлиси намояндагони Маҷлиси Олии Ҷумҳурии Тоҷикистон буҷети соли 2025 – ро тасвиб кард. Ҳаҷми буҷети давлатии соли 2025 49, 6 миллиард сомонӣ (беш аз 4, 5 миллард доллар) пешбинӣ шудааст. Тасдиқи буҷети соли 2025 нисбат ба соли 2024 6, 6 миллиард сомонӣ ё 15, 4 фоиз зиёд аст. Дар қонуни буҷети соли 2025 хароҷоти буҷет 51, 6 миллиард сомонӣ, яъне 2 миллиард сомонӣ бештар мебошад.

Қобили зикр аст, ки Қонуни Ҷумҳурии Тоҷикистон “Дар бораи Буҷети давлатии Ҷумҳурии Тоҷикистон барои соли 2025” –ро рӯзи 4-уми декабр парлумони Тоҷикистон тасдиқ кард. Дар ин бора сомонаи Маҷлиси намояндагони Маҷлиси Олии Ҷумҳурии Тоҷикистон хабар додааст.

Сомонаи Маҷлиси намояндагон меафзояд, ки дар ҷаласаи рӯзи 4-уми декабр ба ғайр аз масъалаи тасдиқи буҷети давлатӣ барои соли 2025, ҳамчунин, дурнамои нишондиҳандаи буҷети давлатӣ барои солҳои 2026-2027 низ баррасӣ шудааст.

Вазири молияи Ҷумҳурии Тоҷикистон зимни шарҳи қонуни буҷети давлатӣ таъкид намудааст, ки дар соли оянда даромади буҷет аз ҳисоби сарчашмаҳои зерин таъмин карда мешавад:

-22,7 миллиард сомонӣ аз ҳисоби андоз (20,4 фоиз зиёдтар нисбат ба соли 2024)

-10, 4 миллиард сомонӣ аз ҳисоби пардохтҳои гумрукӣ (23, 4 фоиз зиёдтар нисбат ба соли 2024)

-1,2 миллиард сомонӣ аз ҳисоби воридоти пардохтҳои ғайриандозӣ (34, 4 зиёдтар нисбат ба соли 224)

-11, 2 миллиард сомонӣ аз ҳисоби лоиҳаҳои сармоягузорӣ (60 фоиз аз ҳисоби грантҳо ва 40 фоиз аз ҳисоби қарзҳо)

Вазири молия ҳамчунин, таъкид кардааст, ки нақшаи қисми хароҷоти давлатӣ дар соли 2025 аз ҳисоби ҳамаи сарчашмаҳои маблағгузорӣ 51, 6 миллиард сомонӣ пешбинӣ шудааст. Зиёд будани хароҷот қариб 2 миллиард сомониро ташкил медиҳад.

Dialog.tj