Президенти Ҷумҳурии Тоҷикистон Эмомалӣ Раҳмон ва раиси шаҳри Душанбе Рустами Эмомалӣ бинои Филармонияи давлатиро, ки навсозӣ ва таъмири замонавӣ шуд, ифтитоҳ намуданд.

Бояд гуфт, ки бинои Филармонияи давлатии ба номи Акашариф Ҷӯраев бо маблағгузории Ҳукумати Ҷумҳурии Тоҷикистон таъмир ва навсозӣ шуда, барои ҳунармандон фазои хуби кориву эҷодӣ муҳайё сохта шуд.

Тибқи иттилои дафтари матбуоти Президент дар ҷараёни корҳои таъмир ва навсозӣ даҳлезҳо, толори барҳавои муассиса бо 989 ҷойи нишаст, 10 ҳуҷраи пардозгарӣ ва ёрирасон таъмиру навсозӣ шудааст. Дар толори консертӣ дастгоҳҳои тақвияти овоз, чароғҳои нави ранга, монитори калон насб карда шудааст. Дар маҷмуъ, дар толор барои баргузории чорабиниҳои сатҳи баланди ҳунарӣ шароити хуби корӣ фароҳам оварда шудааст.

Намои берунии бино комилан навсозӣ шуда, фаввораҳо барқарор ва саҳни бино бо гулу буттаҳои ороишию сояафкан оро ёфтааст.

“Президенти кишвар муҳтарам Эмомалӣ Раҳмон масъулини Вазорати фарҳанги Ҷумҳурии Тоҷикистонро ба истифодаи босамар аз имконияти фароҳамовардаи Ҳукумати кишвар, эҷоди оҳангу сурудҳои баландмазмун, ҷалби ҷавонони соҳибистеъдод ба кор, талқини худшиносӣ ва маънавиёти баланд дар ниҳоди шаҳрвандон ҳидоят намуданд” – овардааст Дафтари матбуоти президент.

Dialog.tj