Эмомалӣ Раҳмон, Президенти Ҷумҳурии Тоҷикистон 8-уми ноябр дар маркази ноҳияи Ҷалолиддини Балхӣ бинои иловагии Муассисаи давлатии таҳсилоти томактабии №6 –ро мавриди баҳрабардорӣ қарор доданд.

Бинои мактаби мазкур аз ду ошёна иборат буда, дар он баҳри таълиму тарбия фаро гирифтани насли наврас шароит фароҳам оварда шудааст.

Мактаби нав дар доираи тадбирҳои ободонию созандагӣ ба пешвози 35 – солагии Истиқлолияти Ҷумҳурии Тоҷикистон аз тарафи Мақомоти иҷроияи ҳокимияти давлатии ноҳия дар муҳлати 1 сол бунёд шуд.

Президенти кишвар зимни шиносоӣ бо шароити бинои навсохти соҳаи маориф ба сифати корҳои анҷомёфта баҳои баланд дода, парасторонро барои дар руҳияи хештаншиносӣ тарбия намудани насли наврас ва истифодаи ҳама имкониятҳо дастуру супоришҳо доданд.

Дар муассисаи томактабии мазкур 6 гурӯҳи таълимӣ бо ду забон: тоҷикӣ ва русӣ таълим хоҳанд гирифт.

Dialog.tj