Эмомалӣ Раҳмон, президенти Ҷумҳурии Тоҷикистон дар маросими гирмидошти 300-солагии шоири маъруфи Туркманистон Махдумқулӣ Фироқӣ дар Туркманистон ширкат намуда, таъкид карданд, ки баргузор намудани мизҳои мудаввари байналмилалӣ бахшида ба ҳаёту фаъолияти Фироқӣ, гузоштани пайкараи Махдумқулӣ дар шаҳри Душанбе, номгузории яке аз кӯчаҳои зебои пойтахти кишвар ва мактаби таҳсилоти миёнаи умумӣ дар ноҳияи Дӯстии вилояти Хатлон нишонаи возеҳи дӯстии мардуми бародари Тоҷикистону Туркманистон аст.

Президенти Тоҷикистон Эмомалӣ Раҳмон бо таъкиди ин нукта, ки Фироқӣ аз мероси адабии мутафаккирони маъруфи сатҳи ҷаҳонии тоҷику форс, аз ҷумла Абулқосим Фирдавсӣ, Умари Хайём, Саъдии Шерозӣ, Ҷалолуддини Балхӣ ва Ҳофизи Шерозӣ илҳом гирифтааст, изҳор доштанд: “Мо минбаъд низ барои рушди ҳамкориҳои фарҳангиву гуманитарӣ бо ҳамаи ширикони худ, аз ҷумла бо Туркманистони бародар талошҳои зарурӣ ба харҷ хоҳем дод”.

Президенти кишвар, ҳамчунин, таъкид намуданд, ки бисёр ходимони адабиёт ва тарҷумонҳои тоҷик даҳҳо маҷмуаи осори ӯро ба забони тоҷикӣ тарҷума ва нашр кардаанд. Дар бораи мазмуну муҳтавои эҷодиёти шоири туркман президенти кишвар изҳор доштанд, ки эҷодиёти Фироқӣ фарогири ғояҳои инсонпарварӣ, дӯстию бародарӣ ва рафоқат буда, мероси эҷодии шоир пули муҳимми густариши робитаҳои фарҳангӣ ва ба ҳам наздик кардани кишварҳову мардумон мебошад.

Ёдовар мешавем, ки 11-уми октябри соли равон дар Туркманистон бо иштироки сарони кишварҳо 300-солагии солгарди шоири маъруфи туркман Махдумқулӣ Фироқӣ баргузор гардид, ки президенди кишвари мо дар он ширкат ва суханронӣ намуданд.