Кишварҳои узви Созмони аҳдномаи амнияти дастаҷамъӣ (СААД) тасмим гирифтаанд, ки барои тақвияти марзи Тоҷикистон бо Афғонистон ба ин кишвар силоҳ ирсол кунанд.

Дар миёни кишварҳои аъзои СААД Русия, Қазоқистон, Қирғизистон ва Беларусия тасмим гирифтаанд, ки барои тақвият додани имкониятҳои низомиву амниятии Тоҷикистон ба ин кишвар силоҳ ё таҷҳизоти муосири ҳарбӣ фиристанд. Ин иқдом барои беҳтар намудани ҳифзи марзи Тоҷикистон бо Афғонистон ва тақвияти назорати сарҳадӣ равона шудааст.

Гуфта мешавад, ки ин кишварҳо интиқоли таҷҳизоти низомиро то поёни соли ҷорӣ оғоз мекунад. Таалатбек Масодиқов, дабири кулли СААД гуфтааст, иҷрои барномаи ирсоли таҷҳизоти низомӣ идома меёбад ва то охири фасли тирамоҳ ба Тоҷикистон расонда мешавад. Ӯ гуфтааст, ин иқдом бар зидди Афғонистон равона нашудааст, ҳадафи он фақат тақвияти амнияти минтақавӣ ва беҳтар кардани назорати сарҳадҳо аст.

Кишварҳои зикршуда ин тасмимро дар шароите мегиранд, ки масъалаи амнияти марзҳои кишварҳои Осиёи Марказӣ бо Афғонистон аз мавзуъҳои муҳимми ҳамкориҳои минтақавӣ боқӣ мемонад. Кишварҳои Осиёи Миёна аз вазъияти Афғонистон нигаронанд. Ба сари қудрат омадани гурӯҳи террористии Толибон, фаъол шудани дигар гурӯҳҳои террористӣ дар Афғонистон боис шудааст, ки СААД чораҳои амниятӣ ва низомиро дар марзи Тоҷикистон бо Афғонистон тақвият кунад. Дарёфти таҷҳизоти нави низомӣ метавонад имкониятҳои техникии неруҳои марзбонӣ ва сохторҳои амниятиро густариш диҳад.

Dialog.tj