Манобеи амрикоӣ гуфтаанд, ки Стив Уиткофф, намояндаи вижаи Амрико ва Ҷаред Кушнер, домоди раиси ҷумҳури ин кишвар, дар охири моҳи ҷорӣ ба Русия мераванд, то бо Владимир Путин, раиси ҷумҳури Русия, дар бораи расидан ба созиши оташбас дар ҷанги Украина музокира кунанд.

“Аксиос” рӯзи ҷумъа, 9-уми октябр, гузориш додааст, ки намояндагони вижаи Доналд Трамп, раиси ҷумҳури Амрико, имрӯз бо музокиракунандагони украинӣ ва мақомоти аврупоӣ мулоқот хоҳанд кард, то “андешаҳо ва пешниҳодҳои нав”-ро барои раҳоӣ аз бунбасти ҷанги Русия ва Украина ироа кунанд.

Бар асоси гузориш, Трамп умедвор аст, ки пеш аз интихоботи миёндавраӣ ва фаро расидани сармои шадиди зимистон дар Украина, ба пешрафти дипломатӣ даст ёбад.

Яке аз ин пешниҳодҳо барқарории оташбаси қисман аст, ки ҳамлаҳо ба зерсохторҳои энергетикӣ ва интиқоли ғалларо боздорад.

Як мақоми украинӣ изҳор доштааст, ки бо вуҷуди шакку тардидҳо дар Киев, интихоботи миёндавраии Амрико ва ниёзи Русия ба коҳиши таҳримҳо метавонанд Владимир Путин, раиси ҷумҳури Русияро, ба қабули як навъи оташбас ташвиқ кунанд.

Бо ин ҳол, ба гуфтаи як манбаи огоҳ, эҳтимол дорад, ки Уиткофф ва Кушнер дар охири ҳамин моҳ барои идомаи гуфтугӯ бо Путин ба Маскав сафар кунанд.

Dialog.tj