Дар доираи чорабиниҳои Ҳафтаи соҳибкорӣ дар Муассисаи давлатии “Ташаккул ва рушди соҳибкории Тоҷикистон” дар вилояти Хатлон семинари омӯзишӣ баргузор шуд.

Ҳадафи семинар баланд бардоштани маърифати соҳибкорон ва шинос кардани онҳо бо имкониятҳои нави технологӣ, роҳҳои муаррифии маҳсулот ва истифодаи платформаҳои рақамӣ барои рушди фаъолияти соҳибкорӣ буд.

Дар чорабинӣ Нурализода Амрулло Назрулло, директори кулли Палатаи савдо ва саноати вилояти Хатлон дар бораи нақши Палата дар рушди иқтисодию иҷтимоии вилоят ва имкониятҳои дастгирии соҳибкорон маълумот дод.

Ӯ, ҳамчунин, дар бораи иштироки соҳибкорон дар намоишгоҳҳои байналмилалӣ, баргузории вохӯриҳои B2B (соҳибкор бо соҳибкор) ва Форуми байналмилалии сармоягузории “Хатлон Инвест-2026” маълумот пешниҳод кард. Ин форум рӯзҳои 22–23-юми октябр дар шаҳри Бохтар баргузор мешавад.

Ба гуфтаи Нурализода Амрулло, баргузории форум метавонад барои соҳибкорон имкониятҳои нави сармоягузорӣ фароҳам оварда, ба рушди фаъолияти соҳибкорӣ мусоидат кунад.

Дар ҷараёни семинар ҳамчунин, масъалаҳои марбут ба платформаи фурӯши маҳсулоти кишоварзии «АХРОХАТЛОН» баррасӣ шуданд. Иштирокчиён бо имкониятҳои ин платформа барои муаррифӣ ва ба бозор баровардани маҳсулоти истеҳсолкардаи соҳибкорони вилоят шинос шуданд.

Яке аз бахшҳои муҳимми семинар ба тарзи дурусти пешниҳоди маҳсулот, муаррифии он ба харидорон ва истифодаи усулҳои муосири банду баст ва бастабандӣ бахшида шуд. Соҳибкорон дар бораи роҳҳои баланд бардоштани рақобатпазирии маҳсулот, ҷалби харидорон ва мутобиқ кардани маҳсулоти худ ба талаботи бозори муосир маълумот гирифтанд.

Дар семинар ҳамчунин, истифодаи технологияҳои иттилоотӣ, воситаҳои рақамӣ ва зеҳни сунъӣ дар фаъолияти соҳибкорӣ мавриди таваҷҷуҳ қарор гирифт. Таъкид шуд, ки истифодаи дурусти ин имкониятҳо метавонад ба соҳибкорон дар рушди тиҷорат ва пайдо кардани бозорҳои нав кумак кунад.

Баргузоркунандагон таъкид карданд, ки муаррифии босифати маҳсулот, бастабандии мутобиқ ба талаботи бозор ва истифодаи платформаҳои рақамии фурӯш метавонад ба соҳибкорони вилоят имкон диҳад, ки доираи харидорони худро васеъ кунанд ва маҳсулоти истеҳсоли маҳаллиро на танҳо дар бозори дохилӣ, балки дар бозорҳои хориҷӣ низ бештар муаррифӣ намоянд.

Дар чорабинӣ соҳибкорон - аъзои Палатаи савдо ва саноати Ҷумҳурии Тоҷикистон дар вилояти Хатлон иштирок ва суханронӣ карданд. Иштирокчиён баргузории чунин семинарҳоро барои баланд бардоштани дониш ва малакаҳои соҳибкорон, рушди соҳибкории рақобатпазир ва истифодаи имкониятҳои рақамӣ муҳим арзёбӣ карданд.

Dialog.tj