Барои беҳтар кардани системаи нафақа, рақамикунонии хизматрасониҳои иҷтимоӣ, тақвият додани ҳифзи молиявии гурӯҳҳои осебпазир барои Тоҷикистон Бонки осиёии рушд 20 миллион доллар грант ҷудо мекунад.

Дар ин хусус, Бонки осиёии рушд рӯзи 2-юми октябр хабар дода, таъкид намуд, ки гранти нав барои навсозии низоми нафақа ва суғуртаи иҷтимоӣ дар Тоҷикистон ҷудо карда мешавад.

Зикр мешавад, ки 19,5 миллион доллари ин грант аз ҷониби Фонди рушди Осиё ва 1 миллион доллари он аз ҷониби Фонди сатҳи бланди технологӣ, ки ҳукумати Ҷопон маблағгузорӣ мекунад, пардохт мешавад.

Ин бонк шарҳ додааст, ки 13,32 миллион доллар аз гранти Фонди рушди Осиё ба бастаи кумакии кишварҳое рабт дорад, ки аз таъсири иқтисодӣ ва молиявии низоъ дар Ховари Миёна осеб дидаанд.

Масато Канда, президенти Бонки осиёии рушд гуфт, амнияти молиявии шаҳрвандон дар даври нафақа набояд ба мушкилоти ҳуҷҷатгузорӣ ва дур будан аз идораҳои давлатӣ вобаста бошад. Ба гуфтаи ӯ, афзоиши нархи ғизову сӯзишворӣ, мушкилоти интиқолу таъминот ва номуайянӣ дар масъалаи муҳоҷирати меҳнатӣ фишор ба оилаҳои камдаромадро бештар намудааст.

Ин бонк гуфтааст, ки ҳаҷми нафақа дар Тоҷикистон дар муқоиса бо кишварҳои Осиёи Марказӣ ва Қафқози Ҷанубӣ камтар аст. Ин бонк таъкид намудааст, ки кормандони ғайрирасмӣ, коргарони мавсимӣ ва муҳоҷирони меҳнатӣ дар бисёр ҳолатҳо ба низоми нафақа пурра фаро гирифта намешаванд.

Дар доираи ин лоиҳа ва тарҳи нав Агентии суғуртаи иҷтимоӣ ва нафақа бо марказҳои муосири нигоҳдории иттилоот ва платформаи ягонаи рақамӣ таъмин карда мешавад.

Гуфта мешавад, ки дар доираи ин грант сабтҳои мавҷуда рақамӣ шуда, мубодилаи иттилоот миёни мақомоти кишвар беҳтар ва чораҳои ҳифзи киберамният густариш дода мешаванд. Идораҳои агентӣ дар шаҳри Душанбе ва Бохтар низ навсозӣ хоҳанд шуд.

Бонки осиёии рушд иттилоъ медиҳад, ки низоми нав метавонад хизматрасониҳои тезтар ва бехатарро, барои ҳадди ақал 320 ҳазор нафар нафақаи суғуртавӣ ва 250 ҳазор нафақахӯр таъмин намояд.

Dialog.tj