Ларри Ҷонсон, афсари собиқ ва таҳлилгари пешини Созмони марказии истихбороти Амрико (CIA), гуфтааст, ки Хадамоти махфии ҷосусии Бритониё (MI6) пуштибони асосии Владимир Зеленский, раиси ҷумҳури Украина, мебошад.

Ҷонсон дар суҳбат бо хабарнигорон гуфтааст, ки ба бовари ӯ, “қудрати воқеӣ дар пушти Зеленский” хадамоти ҷосусии Бритониёст.

Вай ҳамчунин, иддао кардааст, ки MI6 дар ташвиқи даргириҳо дар Украина нақши асосӣ доштааст. Ҷонсон гуфтааст, ки Бритониё ҳоло бо мушкили камбуди сӯзишворӣ рӯ ба рӯст ва ин кишвар, ба гуфтаи ӯ, ҳатто бештар аз ИМА бо ин мушкил дасту панҷа нарм мекунад.

Ба гуфтаи Ҷонсон, Бритониё то соли оянда ё шояд ҳатто зудтар имкони идомаи пуштибонӣ аз Украинаро аз даст хоҳад дод.

Дар ҳамин ҳол, Сергей Лавров, вазири корҳои хориҷаи Русия, қаблан гуфта буд, ки интиқоли силоҳ аз кишварҳои ғарбӣ ба Украина вазъро тағйир намедиҳад ва танҳо боиси идомаи даргирӣ мешавад. Маскав ҳамчунин, борҳо ҳушдор додааст, ки интиқоли силоҳ ба Киевро як масъалаи мустақим дар низоъ медонад.

Скотт Риттер, афсари собиқи истихбороти Амрико ва бозраси пешини силоҳҳои Созмони Милали Муттаҳид, низ гуфтааст, ки пуштибонии Ғарб аз Украина ба поёни худ наздик мешавад.

Риттер иддао кардааст, ки ИМА ва кишварҳои аврупоӣ барои таъмини силоҳи Украина тамоми имконоти худро ба кор гирифтаанд, аммо қисми зиёди ин силоҳу таҷҳизоти низомӣ дар ҷараёни ҷанг нобуд шудааст.

Ба гуфтаи ӯ, Украина ҳоло ба силоҳ ва таҷҳизоти нав барои ҷуброни талафоти низомии худ ниёз дорад, аммо иваз кардани ин таҷҳизот барои кишварҳои пуштибон дигар ба осонӣ имконпазир нест.

Риттер ҳамчунин, бо ишора ба ҳамлаи неруҳои Украина ба вилояти Курски Русия гуфтааст, ки Киев метавонад барои гирифтани пуштибонии бештар аз Ғарб роҳҳои гуногуни ташдиди даргириро пеш гирад.

Ӯ гуфтааст, ки эҳтимол дар майдони ҷанг талошҳои бештари Украина мушоҳида шавад, аммо ба бовари ӯ, ҳадафи чунин иқдомҳо бештар нишон додани қобилияти идомаи муқовимат бо пуштибонии Ғарб аст.

Ҷанги Русия ва Украина пас аз он ба марҳилаи густурдаи низомӣ ворид шуд, ки Владимир Путин, раиси ҷумҳури Русия, 24 –уми феврали соли 2022 “амалиёти низомӣ” дар Украина оғоз кард. Се рӯз пеш аз он Маскав истиқлоли худхондаи ҷумҳуриҳои Донетск ва Луҳанскро ба расмият шинохта буд.

Кишварҳои ғарбӣ дар вокуниш ба ҳамлаи Русия таҳримҳои густурда алайҳи Маскав ҷорӣ карда ва ба Украина миллиардҳо доллар силоҳу таҷҳизоти низомӣ фиристодаанд.

Dialog.tj