“Уолл-стрит журнал” (The Wall Street Journal) бо истинод ба як мақоми аршади Кохи Сафед хабар додааст, ки Доналд Трамп, раиси ҷумҳури Амрико, то кунун бо мушовиронаш дар бораи эълон кардани тангаи Ҳурмуз ба унвони “қаламрави Амрико” гуфтугӯ накардааст ва изҳороти ӯ дар ин маврид бештар ҷанбаи шӯхӣ доштааст.

Ин мақоми аршади Кохи Сафед гуфтааст, ки суханони Трамп дар бораи “эълон кардани тангаи Ҳурмуз ба унвони қаламрави Амрико” ба маънои пешниҳоди сиёсати расмӣ аз сӯйи ҳукумати Вашингтон нест.

Трамп шоми ҷумъа дар як суханронӣ дар Лонг-Айленди иёлати Ню-Йорк гуфта буд, ки ба зудӣ тангаи Ҳурмузро қаламрави Иёлоти Муттаҳида эълон хоҳад кард.

Дар пайи ин изҳорот, Козим Ғарибободӣ, муовини ҳуқуқӣ ва байналмилалии Вазорати корҳои хориҷии Эрон, дар сафҳаи шахсии худ дар шабакаи иҷтимоии “Х” навишт: “Тангаи Ҳурмузро на бо твит метавон тасарруф кард, на бо киштии ҳавопаймобар, на бо содир кардани фармон ва на бо суханронии интихоботӣ”.

Ӯ афзудааст: “Эрон на аз таҳдид метарсад ва на бо намоиши қудрат тарсонда мешавад”.

Dialog.tj