Исмоил Бақоӣ, сухангӯи Вазорати корҳои хориҷии Эрон, иддаои Доналд Трамп дар бораи оғози музокироти Эрон ва Амрикоро рад карда, гуфт, ки дар ҳоли ҳозир ҳеч гуфтугӯе миёни ду кишвар ҷараён надорад ва тамаркузи музокироти кунунӣ танҳо бар ҳамоҳангӣ бо Уммон дар бораи амнияти киштиронӣ дар тангаи Ҳурмуз аст.

Бақоӣ рӯзи душанбе, 3-уми август дар нишасти матбуотӣ бо хабарнигорон гуфт, ки вазири корҳои хориҷии Эрон барои сафари Арбаъин роҳии Ироқ шудааст ва ҳамаи аъзои ҳайати музокиракунандаи эронӣ дар дохили кишвар ҳузур доранд.

Вай дар посух ба суоле дар бораи изҳороти ахири Доналд Трамп, ки гуфта буд музокирот бо Эрон аз имрӯз оғоз мешавад, афзуд: “Ҳоло ҳеч музокирае бо Амрико надорем”.

Сухангӯи Вазорати корҳои хориҷии Эрон таъкид кард, ки гуфтугӯҳои давомдор бо Уммон танҳо ба муайян кардани масири амни убури киштиҳо аз тангаи Ҳурмуз марбут аст. Ба гуфтаи ӯ, ин музокирот дуҷониба буда, байни ду кишвари соҳилӣ анҷом мешавад ва ҳадафи он таъмини амнияти киштиронӣ аст.

Бақоӣ гуфт, тавофуқ бар сари масири нави ҳаракати киштиҳо барои бозкушоии тангаи Ҳурмуз “шарти зарурӣ” аст, аммо барои боз шудани комили ин оброҳ кофӣ нест. Ӯ таъкид кард, ки баста шудани тангаи Ҳурмуз натиҷаи “таҷовузи низомии Амрико ва Исроил” буда ва то замоне ки ин вазъият идома ёбад, тағйири ҷиддие дар шароити ин гузаргоҳи муҳим ба вуҷуд нахоҳад омад.

Вай ҳамчунин, гуфт, Покистон миёнарави асосӣ дар масъалаҳои марбут ба Эрон ва Амрико аст ва Қатар низ дар баъзе мавридҳо нақши кумаккунанда дорад. Ба гуфтаи ӯ, Чин аз роҳи талошҳои дипломатӣ барои коҳиши танишҳо саҳм мегирад, аммо миёнарави нави ин раванд нест.

Бақоӣ дар бахши дигаре аз суханонаш гуфт, Эрон ҳамчунон бо кишварҳои минтақа дар тамос аст ва афзуд, ки Теҳрон бар афзоиши тавони боздорандагии худ барои ҳифзи манфиатҳои миллӣ таъкид мекунад.

Ин изҳорот дар ҳоле баён мешавад, ки Доналд Трамп пештар аз оғози музокирот бо Эрон хабар дода буд, аммо мақомоти эронӣ ин иддаоро рад кардаанд.

Dialog.tj