Тед Лё, муовини раиси фраксияи демократҳои Маҷлиси намояндагони Иёлоти Муттаҳида аз иёлати Калифорния, бо интиқод аз пешниҳоди ҷорӣ кардани тарофаҳои нав алайҳи Эрон, Доналд Трамп, раиси ҷумҳури Амрикоро “нодон ва дурӯғгӯ” хондааст.

Ба гузориши расонаҳои эронӣ, Лё рӯзи ҷумъа дар паёме дар шабакаи иҷтимоии “Х” бо бознашри изҳороти Трамп дар бораи ҷорӣ кардани тарофаҳои тиҷоратӣ алайҳи Эрон навиштааст, ки Иёлоти Муттаҳида аз пештар тиҷорат бо Эронро таҳти маҳдудият қарор додааст ва тарофаҳои нав таъсири амалие нахоҳанд дошт.

Вай афзудааст, ки Эрон аз ин таҳдиди Трамп “механдад” ва онро ҷиддӣ намегирад.

Ин изҳорот пас аз он матраҳ шуд, ки Доналд Трамп дар Кохи Сафед дар посух ба суоли хабарнигорон дар бораи эҳтимоли тасвиби лоиҳаи таҳримҳои Русия ва Эрон аз сӯйи Конгресс гуфта буд, ки мехоҳад Эрон низ ба феҳристи кишварҳое, ки алайҳи онҳо тарофа ҷорӣ мешавад, илова гардад.

Трамп иддао кардааст, ки ҷорӣ шудани тарофаҳо алайҳи Эрон ин иқдомро “бисёр қавитар” хоҳад кард. Ӯ ҳамчунин, гуфтааст, ки ба назари вай, ҳам алайҳи Русия ва ҳам алайҳи Эрон бояд тарофа ҷорӣ шавад.

Ин изҳорот дар ҳоле садо медиҳад, ки танишҳо миёни Вашингтон ва Теҳрон ҳамчунон идома дошта, ду кишвар дар масъалаҳои таҳримҳо, барномаи ҳастаӣ ва сиёсати минтақавӣ ихтилофҳои ҷиддӣ доранд.

Dialog.tj