Вазорати корҳои хориҷии Чин гузоришҳо дар бораи эҳтимоли ирсоли аслиҳа ба Эронро “нодуруст ва беасос” хонда, таъкид кардааст, ки Пекин ҳамеша дар коҳиши танишҳо ва пешбурди сулҳ нақши созанда доштааст.

Мао Нин, сухангӯи Вазорати корҳои хориҷии Чин, рӯзи панҷшанбе дар вокуниш ба гузоришҳое, ки Пекин қасд дорад чандин мушакро дар ихтиёри Эрон қарор диҳад, рад кардааст.

Ба гузориши “Глобал Таймс”, Мао Нин дар посух ба суоли хабарнигорон чунин гуфтааст: “Мо пеш аз ин ҳам дар мавридҳои гуногун мавқеи худро дар ин замина ба таври рӯшан баён кардаем. Чин ҳамеша дар пешбурди сулҳ ва коҳиши танишҳо дар даргириҳо нақши созанда доштааст”.

Изҳороти ин мақоми чинӣ дар ҳоле матраҳ мешавад, ки рӯзи гузашта бархе расонаҳои ғарбӣ, аз ҷумла “Ройтерз”, муддаӣ шуданд, ки Эрон дар ҳафтаҳои оянда нахустин маҳмула аз маҷмуи тақрибан 400 сомонаи мушакии падофанди ҳавоии сохти Чинро дарёфт хоҳад кард.

Ин аввалин бор нест, ки расонаҳои ғарбӣ аз ҳамкории таслиҳотии Чин ва Эрон гузориш медиҳанд. Аз замони авҷ гирифтани танишҳо дар Ғарби Осиё, ба вижа пас аз оғози ҷанги Амрико алайҳи Эрон, кишварҳои ғарбӣ ба раҳбарии Иёлоти Муттаҳида борҳо бо матраҳ кардани чунин иддаоҳо, ҳамкориҳои миёни Теҳрон, Пекин ва Маскавро мавриди таваҷҷуҳ қарор додаанд.

Дар айни ҳол, Чин, Эрон ва Русия ҳамеша таъкид кардаанд, ки равобити онҳо моҳияти дифоӣ ва иқтисодӣ дорад ва чунин овозаҳоро бахше аз талошҳои Ғарб барои густариши “Эронҳаросӣ” ва “Чинҳаросӣ” медонанд.

Dialog.tj