Ҷунбишҳои эътирозии занони Афғонистон бо нашри баёнияи муштарак аз истодагӣ ва муборизаҳои неруҳои озодихоҳ бар зидди Толибон дар Бадахшон ва дигар вилоятҳои ин кишвар ҳимоят кардааст.

Ин ҷунбишҳои эътирозии занон рӯзи чоршанбе, 29-уми июл, гуфтаанд, ки ҳокимияти гурӯҳи террористии Толибон бар Афғонистон бо саркӯб, табъиз, хушунат ва нақзи густурдаи ҳуқуқи башар, мардуми Афғонистонро дар яке аз ториктарин давраҳои таърихи муосир қарор додааст.

Бар асоси ин баёния, ҷунбишҳои эътирозии занони Афғонистон бо ишора ба вазъи занону духтарони ин кишвар таҳти ҳокимияти Толибон гуфтаанд, ки занон аз иштирок дар зиндагии иҷтимоӣ маҳрум буда, дар зери сояи апартеиди ҷинсие, ки аз сӯйи Толибон ҷорӣ шудааст, зиндагӣ мекунанд.

Дар баёния омадааст, ки имрӯз мардуми Афғонистон ба нуқтае расидаанд, ки идомаи таҳаммули ин вазъиятро номумкин медонанд ва дар чунин шароит истодагӣ ва муқовимат дар баробари истибдод, хости табиӣ ва ҳақи мардумест, ки тамоми роҳҳои осоиштаи додхоҳӣ бар рӯи онҳо баста шудааст.

Дар бахши дигари баёния таъкид шудааст: “Мо бо эҳтиром аз истодагии ҷавонони озодихоҳи Афғонистон дар вилояти Бадахшон таҳти номҳои Ҷабҳаи озодӣ, Сипоҳи Ватан ва Ҷабҳаи муқовимати миллии Афғонистон ёд мекунем: ҷавононе, ки аз дили ҳамин ҷомеа бархостаанд ва дар кӯҳистони Помири Бадахшон барои озодӣ, каромати инсонӣ, адолат ва раҳоии мардуми Афғонистон аз ҳокимияти Толибон истодагӣ мекунанд”.

Дар ин баёния аз табъиз алайҳи пайравони мазҳаби шиа, издивоҷҳои иҷборӣ, боздоштҳои худсарона, табъиз нисбат ба забони форсӣ ва дигар мавридҳо ҳамчун намунаҳои саркӯби ҷомеаи гуногунмиллати Афғонистон аз сӯйи Толибон ёд шудааст.

Ҷунбишҳои эътирозии занони Афғонистон аз ҷомеаи ҷаҳонӣ хостаанд, ки муборизаҳои қонунии мардуми Афғонистон ва ҷабҳаҳои озодихоҳу муқовиматро ба расмият шинохта, садои мардуми Афғонистонро бишнаванд.

Dialog.tj