Раиси ҷумҳури Украина, Владимир Зеленский, пас аз дидор бо Доналд Трамп дар Кохи Сафед аз вай хостааст, ки барои муқобилият бо ҳамлаҳои Русия як “бастаи изтирории зимистона” иборат аз мушакҳои раҳгири “Патриот” дар ихтиёри Киев қарор диҳад.

Ба гузориши “Аксиос” (Axios), Зеленский гуфтааст, ки захираҳои мушакҳои раҳгири Украина қариб ба поён расидаанд ва дар сурати дарёфт накардани кумаки фаврӣ, ин кишвар тавони дифоъ аз худ дар баробари мушакҳои баллистикии Русияро аз даст хоҳад дод.

Ба гуфтаи вай, идомаи ин вазъ метавонад дар фасли зимистон ба ҳамлаҳои густурда алайҳи зерсохторҳои энержии Украина роҳ боз кунад: ҳамлаҳое, ки эҳтимол неругоҳҳои барқро аз байн бурда, низоми гармидиҳии миллионҳо шаҳрвандро халалдор созанд ва буҳрони башарӣ ба вуҷуд оваранд.

“Аксиос” навиштааст, ки камбуди мушакҳои раҳгири “Патриот” танҳо ба Украина маҳдуд намешавад. Ба гуфтаи ин расона, захираҳои Иёлоти Муттаҳида низ пас аз даргириҳои ахир бо Эрон коҳиш ёфта ва ҳамин масъала ирсоли ин мушакҳоро ба Киев душвортар кардааст.

Зеленский гуфтааст, ки дар мулоқоти ахираш бо Трамп, ду ҷониб дар бораи иҷозаи тавлиди мушакҳои раҳгири Patriot дар “Патриот” Украина низ гуфтугӯ карданд. Ба гуфтаи раиси ҷумҳури Украина, Трамп барои пешбурди ин раванд изҳори омодагӣ кардааст.

Раиси ҷумҳури Украина ҳамчунин, пас аз дидор бо Трамп бо намояндагони ширкатҳои “Lockheed Martin” ва “Raytheon”, тавлидкунандагони мушакҳои “Патриот”, мулоқот карда, масъалаи ҳамкориҳои саноати дифоиро баррасӣ кардааст.

Бо вуҷуди ин, “Аксиос” таъкид кардааст, ки ҳатто дар сурати содир шудани иҷозатнома, тавлиди ҳаҷми зиёди мушакҳои раҳгир аз як то панҷ сол вақт хоҳад гирифт.

Зеленский бо ишора ба ниёзи фаврии кишвараш гуфтааст: “Мо дирӯз ба Патриот ниёз доштем”.

Ба гуфтаи вай, Русия дар ҳар ҳамлаи густурда алайҳи Украина аз “30 то 40 мушаки баллистикӣ” истифода мекунад ва ҳар моҳ “се то панҷ ҳамла” аз ин навъ анҷом медиҳад.

Зеленский афзудааст, ки Трамп ваъда додааст барои расонидани кумак талош хоҳад кард, аммо ҳамзамон таъкид кардааст, ки ба далели ниёзи Иёлоти Муттаҳида ба мушакҳои раҳгир дар дигар ҷабҳаҳо, иҷрои ин дархост осон нахоҳад буд.

Dialog.tj