Владимир Путин, раиси ҷумҳури Русия, мегӯяд, ки мухолифон ва душманони ин кишвар пас аз нокомӣ дар шикасти Русия дар майдони ҷанг, ба “равишҳои ошкори террористӣ” алайҳи мардуми Русия рӯ овардаанд. Ӯ ҳамзамон таъкид кардааст, ки Маскав ба тамоми ҳадафҳои низомии худ дар ҷанги Украина хоҳад расид ва барои посухи қотеъ ба ҳар гуна иқдоми душманона омода аст.

Ба гузориши хабаргузории “ТАСС”, Путин рӯзи душанбе, 27-уми июл дар дидор бо намояндагони Думаи давлатии Русия гуфтааст, ки талошҳои рақибони Маскав барои шикаст додани Русия дар майдони набард натиҷа надодааст ва онҳо акнун ба гуфтаи ӯ, аз усулҳои террористӣ истифода мекунанд.

Раиси ҷумҳури Русия гуфтааст: “Онҳое, ки натавонистанд Русияро дар майдони ҷанг шикаст диҳанд, акнун дар муқобили мардуми мо ба равишҳои ошкори террористӣ рӯ овардаанд”. Ӯ афзудааст, ки мардуми Русия ҳеч гоҳ аз ҷониби ҳеч кас шикаст нахоҳанд хӯрд.

Путин ҳамчунин, таъкид кардааст, ки Русия ба тамоми ҳадафҳои низомии худ дар ҷанги Украина даст хоҳад ёфт. Ба гуфтаи ӯ, ҳукумати Русия дар ҳамоҳангӣ бо ниҳодҳои давлатӣ барои муқобилият бо ҳар гуна иқдоми душманона омодагии комил дорад.

Ӯ дар поёни суханронии худ гуфтааст: “Мо барои дифоъ аз кишвари худ омодаем ва ҳамроҳ бо ҷомеаи Русия метавонем ба ҳар иқдоми душманона посухи қотеъ диҳем”.

Dialog.tj