Кохи Сафед эълом кард, Ҷей Ди Вэнс, муовини раиси ҷумҳури Амрико, ки қарор буд тибқи барномаи қаблӣ барои имзои ёддошти тафоҳум бо Эрон ба Швейтсария биравад, имшаб (панҷшанбе) ба ин кишвар сафар нахоҳад кард.

Ба гузориши расонаҳои Амрико як сухангӯи Кохи Сафед шаби панҷшанбе ба вақти маҳаллӣ (шарқи Амрико) ба шабакаи “CNN” дар бораи далели лағви сафари Вэнс ба Женеваи Швейтсария чунин гуфтааст: “Сабаби анҷом нашудани ин сафар дар имшаб, масоили ҳалнашудаи логистикӣ марбут ба марҳалаи баъдии музокироти Эрон ва Амрико аст”.

Ин сухангӯи Кохи Сафед эълом кардааст: “Ҳамон гуна ки муовини раиси ҷумҳур дар нишасти матбуотии худ баён кард, барномарезӣ барои гуфтугӯҳои фаннии пешорӯ ҳанӯз ниҳоӣ нашудааст ва ҳайати амрикоӣ омода буд, то ҳарчи зудтар ҳаракат кунад, аммо барнома ва логистикаи ин музокирот ҳаргиз сода ё қобили пешбинӣ набудааст”.

Ин сухангӯи Кохи Сафед афзудааст: “Дар ҳоли ҳозир, муовини раиси ҷумҳур имшаб кишварро тарк намекунад”.

Ин мақоми Кохи Сафед таъкид кардааст: “Муштоқона мунтазири ҳарчи зудтари оғози гуфтугӯҳои фаннӣ ҳастем”.

Вэнс қарор буд рӯзи ҷумъа барои маросими расмии имзои ин ёддошти тафоҳум ба Швейтсария сафар кунад.

Муовини Трамп рӯзи панҷшанбе ба хабарнигорон гуфт, ки қасд дорад барои имзои ҳузурии ин тавофуқ ба Швейтсария сафар кунад, ҳарчанд эътироф кард, ки вақти дақиқи он ҳанӯз муайян нест.

Вэнс ҳамчунин, гуфт интизор меравад музокироти фаннӣ барои ниҳоисозии ин тавофуқ охири ҳамин ҳафта оғоз шавад ва ӯ “қатъан дар ҳоли барномарезӣ” барои раҳбарии тими музокиракунандаи Амрико аст.

Dialog.tj