Владимир Путин, раиси‌ ҷумҳури Русия дар дидор бо иштироккунандагони “амалиёти низомии вижа” дар Кремл гуфтааст, ки Русия ҳамлаҳои ҷавобии худро афзоиш хоҳад дод.

Хабаргузории ТАСС гузориш додааст, ки Путин ин изҳоротро рӯзи ҷумъа, 12-уми июн, ҳамзамон бо Рӯзи Русия ва Рӯзи неруҳои низомии ин кишвар, матраҳ кардааст.

Ӯ гуфтааст, ки беш аз 700 ҳазор сарбози рус дар минтақаи “амалиёти низомии вижа” ҷобаҷо ҳастанд ва неруҳои ин кишвар ба гунаи тадриҷӣ дар ҳоли пешравӣ ҳастанд.

Раиси‌ ҷумҳури Русия афзудааст, ки воҳидҳои ҳамлавар нақши калидӣ дар майдони набард доранд ва давлат дар ҳоли баррасии барномаҳои омӯзишӣ, табобатӣ ва корӣ барои иштироккунандагони ин амалиёт аст.

Путин, ҳамчунин, гуфтааст, ки Русия дар ҳоли рушди паҳподҳои FPV ва системаҳои бидуни сарнишини муҷаҳҳаз бо зеҳни сунъӣ аст ва Вазорати дифои ин кишвар дар ҳоли табдил шудан ба як ниҳоди пешрафтаи технологӣ мебошад.

Ӯ иддао кардааст, ки Русия системаи беҳтар аз “Starlink”-ро сохтааст ва дар ҳоли густариши шабакаи моҳвораии худ аст, аммо ба гуфтаи ӯ ин зарфият ҳанӯз кофӣ нест.

Раиси ‌ҷумҳури Русия афзудааст, ки Маскав дар талош аст тавоноии дифои ҳавоии худро тақвият диҳад ва дар соҳаи силоҳ ҳамеша як қадам пештар аз тарафи муқобил қарор дошта бошад.

Путин ҳамчунин, гуфтааст, кишварҳои НАТО набояд бо Русия вориди ҷанг шаванд ва ҳушдор додааст, ки чунин иқдом паёмадҳои ҷиддӣ хоҳад дошт.

Dialog.tj