Ҷабҳаи озодии Афғонистон иддао кардааст, ки дар пайи як ҳамла бар маъмурони амр ба маъруф ва наҳй аз мункари Толибон дар Ҳирот, се тан аз онҳо кушта ва ду тани дигарро захмӣ кардааст.

Ҷабҳаи озодӣ рӯзи 12-уми июн дар хабарномае гуфта, ки ин ҳамла тахминан соати 10:00-и шаб дар баробари дарвозаи вуруди қароргоҳи амр ба маъруф ва наҳй аз мункари Толибон дар шаҳри Ҳирот анҷом шудааст.

Ба гуфтаи ин ҷабҳа, дар ин ҳамла таҷаммуи маъмурони амр ба маъруф ва наҳй аз мункари Толибон ҳадаф қарор гирифтааст.

Ин ҷабҳа афзудааст, ки дар натиҷаи ин ҳамла се тан аз маъмурони амр ба маъруфи Толибон кушта ва ду тан дигар захмӣ шудаанд.

Ҷабҳаи озодӣ гуфта, ки ин амалиёт дар вокуниш ба он чи саркӯби эътирозҳои мардумӣ ва озори занон аз сӯйи Толибон дар Ҳирот хондааст, анҷом шудааст.

Ин ҷабҳа пеш аз ин низ дар пайи боздошт шудани духтарон ва занон аз сӯйи Толибон дар Кобул ҳушдор дода буд, ки маъмурони ин гурӯҳро ҳадаф қарор медиҳад.

Dialog.tj