Коршиносони Созмони Милали Муттаҳид дар вокуниш ба боздошти занон ва саркӯби эътирозгарон дар Ҳироти Афғонистон мегӯянд, ки Толибон бояд ба уҳдадории ҳуқуқи башарӣ, аз ҷумла Конвенсияи манъи шиканҷа ва Конвенсияи маҳви табъиз алайҳи занон пойбанд бошанд.

Коршиносон рӯзи 11-уми июн бо нашри эъломияе нисбат ба гузоришҳое дар бораи “истифодаи беш аз ҳадди зӯр” алайҳи эътирозгарон дар шаҳри Ҳирот изҳори нигаронии амиқ кардаанд.

Дар эъломия омада, ки истифода аз зӯр дар иҷрои қонун танҳо дар чорчӯби ҳуқуқи байналмилал ва ба сурати қонунӣ, зарурӣ ва мутаносиб аст.

Рӯзи сешанбеи гузашта, шуморе аз мардум дар Ҳирот барои эътироз ба маҳдудиятҳо ва боздошти даҳҳо зан ба далели надоштани ҳиҷоб (бурқаъ) дар Ҳирот таҷаммуъи эътирозӣ баргузор карданд.

Бар асоси эъломия, ҷангҷӯёни гурӯҳи террористи Толибон ба сӯйи эътирозгарон, ки аз мардон, занон ва кӯдакон иборат буданд тирандозӣ карда ва ононро латукӯб карданд, ки дар натиҷа дастикам ду тан аз ҷумла як кӯдак кушта ва беш аз бист тан захмӣ шуданд.

Коршиносони Созмони Милал аз Толибон хостаанд, то дар бораи ин рӯйдод таҳқиқоти фаврӣ, мустақил ва шаффоф анҷом диҳанд ва аз идомаи саркӯби эътирозҳо ҷилавгирӣ кунанд.

Dialog.tj