Исмоил Бақоӣ, сухангӯи Вазорати корҳои хориҷаи Эрон, ҳамзамон бо ташдиди даргириҳои низомӣ миёни Эрон ва Амрико, гуфт, ки Вашингтон бо “нақзи пайвастаи оташбас”, ба раванди дипломатӣ осеб мерасонад.

Хабаргузории “Меҳр”, рӯзи чоршанбе, 10-уми июн, гузориш додааст, ки Исмоил Бақоӣ, “нақзи пайвастаи оташбас”-ро аз сӯи Исроил дар Лубнон низ омили осеб дидани раванди дипломатӣ донистааст.

Бар асоси гузориш, сухангӯи Вазорати хориҷаи Эрон гуфтааст, ки барои пешбурди ҳар музокирае ниёз ба як фазои ҳадди ақал вуҷуд дорад, то кори дипломатӣ пеш бурда шавад.

Вай афзудааст, ки Теҳрон ҳар куҷо лозим бошад, аз абзори дипломатия ва ҳар ҷо зарур донад, аз неруи низомӣ истифода хоҳад кард.

Теҳрон ва Вашингтон аз ҳафтаҳо ба ин сӯ бо миёнҷигарии Покистон дар ҳоли музокира ҳастанд, аммо дар рӯзҳои ахир бо нақзи оташбас аз ҷониби Амрико ва Исроил даргириҳои низомии ду тараф афзоиш ёфтааст.

Dialog.tj