Владимир Зеленский, президенти Украина дар изҳороте бо интиқод аз Доналд Трамп, президенти Амрико ба хотири фишор бар Киев барои додани имтиёз дар масири дастёбӣ ба сулҳ, таъкид кард: “Чаро фақат Украина бояд имтиёз диҳад?”

Зеленский дар мусоҳиба бо шабакаи хабарии амрикоии “Аксиос” гуфт: “Ин аз рӯйи инсоф нест, ки Трамп дар суханони ҳавоии худ мураттаб аз Украина бихоҳад, ки барои дастёбӣ ба сулҳ имтиёз диҳад, аммо чунин интизориро аз Русия матраҳ намекунад”.

Президенти Украина бо ишора ба ин, ки Трамп дар рӯзҳои ахир ду бор гуфтааст, масъулияти додани имтиёз бар уҳдаи Украина аст, афзуд: “Умедворам ин суханон танҳо бахше аз тактикаҳои ӯ бошад ва тасмими воқеияш чунин набошад”.

Вай ҳамчунин, бо баёни ин, ки мумкин аст барои Трамп осонтар бошад, фақат Киевро барои додани имтиёз таҳти фишор қарор диҳад ва аз Русия, ки бисёр паҳновартар аз Украина аст чунин дархосте накунад, таъкид кард: “Роҳи эҷоди сулҳи пойдор, пешкаш кардани пирӯзӣ ба Владимир Путин, президенти Русия нест”.

Зеленский дар идома бо ишора ба ин, ки Стив Уиткофф, намояндаи вижаи Доналд Трамп ва Ҷаред Кушнер, домод ва мушовири президенти Амрико ба ӯ гуфтаанд, ки Русия воқеан мехоҳад ба ҷанг поён диҳад, афзуд: “Ман нисбат ба нияти воқеии Маскав бисёр бадбин ҳастам”.

Вай ҳамчунин, бо таъкид бар ин, ки Уиткофф ва Кушнер набояд ӯро ба додани имтиёзҳои арзӣ дар муқобили сулҳ водор кунанд, гуфт: “Мардуми Украина иҷоза намедиҳанд хоки ин кишвар ба Русия вогузор шавад”.

Ба гузориши расонаҳо президенти Украина пештар ва ҳамзамон бо баргузории музокироти сулҳ дар Женева гуфта буд, ки дипломатия дар сурате метавонад муассиртар воқеъ шавад, ки бо қудрат ҳамроҳ бошад.

Аммо дар ҳоле ки намояндагони Амрико, Русия ва Украина барои баргузории даври ҷадиде аз музокирот дар Женева ҳузур доранд, Владимир Зеленский дар канали телеграмии худ навишт: “Диплломатияи мо замоне муассиртар хоҳад буд, ки адолат ва қудрат вуҷуд дошта бошад”.

Вай тасреҳ кард, ки ба ҳамин манзур хостори ташдиди фишорҳои таҳримӣ алайҳи Русия, ҳимоят аз неруҳои мусаллаҳи Украина ва тақвияти сомонаҳои падофанди ҳавоии кишвараш аст.

Dialog.tj